Shillong, Naitung 06: U Nongialam ka BJP bad Myntri Sorkar Bah Sanbor Shullai hynne ka sngi balang, ula pyrshah jur ia ka jingkren jong u Lamphang ka Iingdorbar Thaw Ain Bah Metbah Lyngdoh, ba pynpaw ia ka jingsngewkhia halor ka jingshah thombor ki paid riewlum hapoh ka Ri.
U Bah Metbah ula pynpaw ia kane ka jingsngewkhia haba ai jingkren ha ka jingialang wan iuhkjat jong ka Kyrtong iakhun elekshon President ka Ri ka Draupadi Murmu, kaba dei ka kyrtong ka National Democratic Alliance (NDA) ba ialam da ka BJP, hynne ka sngi ha Orchid Lake Resort, Umiam.
“Katba u Lamphang u dang pynpaw ia ka jingsngewkhia halor ki kam thombor pyrshah ia ki paid riewlum ha kylleng ki bynta jong ka Ri, u Bah Sanbor ula ieng ban pyrshah bad ong ba kam ju don satia ka jingshah thombor ki paid riewlum hapoh ka Ri” ong ki katto katne ki MLA kiba don ha ka jingialang.
Kine ki MLA kila iathuh ba u Lamphang ula bitar bha ia kane ka jingleh u Bah Sanbor hakhmat kane ka kyrtong President.
