Shillong, May 26: Ka dei ka sien ba nyngkong ha ka Meghalaya State Leaque-2023 hynne ka sngi thohdieng, ha kaba baroh saw tylli ki jingiakhun kila wanrah ia kaei kaba kaba dang thymmai ne ka bym pat ju jia koit, ha kane ka aiom ba mynta.
Hynrei kaba la pynkyndit ia kiba bun kadei ba ka Ladthadlaboh kala shah pynrem noh ha ka Youth Club Pdengkarong da 1-0 ha ka jingialehkai kaba la long ha Kiang Nangbah Stadium, Jowai. Kane ka jingshah rem ka Ladthalaboh ka lah ban pynduh noh syndon iaka ban ioh rung sha ka semifinal.
Ha ka Group A ka Umkseh kaba la shah thep kol nyngkong, kala lah ban pynphai bad pynliem iaka Jyntru 3-2 kol bad ban jop ha ka sien kaba nyngkong ha ka MSL bad kane kala long ruh kumjuh ha ka Group D ha kaba ka Atong Matgrik kaba la shah thep nyngkong kala lah ban pynphai bad pynliem iaka Warima Youth Club da 4-3 kol bad kane kadei ruh ka sien kaba nyngkong iaka Atong Matgrik ban ioh kamai 3 point ha ka MSL.
Ha ka Group C, ka Mawten bad ka Seven United kila iakhaid noh ha ka jingiakhun haba kim shym la lah ban thep kol eiei.
Na ka jingbakla bishar u nongap kol ka Ladthalaboh u Juhhi Suchiang, ha ka minit kaba 27 u Menri Buam Pdengkarong ula shut iaka bol ha ka por ba ioh iaka Free Kick ba ia katei ka bol la dei ban shu kem da kaba suk, hynrei u nongapkol namar ka jingbakla ula leit tur kloi sha ka bol bad katei ka bol kala leit rung pynban shapoh kol.
Ka Ladthalaboh kala ialehkai bha ha ka kylla step bad kylla miet hynrei kam shym la lah pat ban thep shi kol ruh.
Ka jingshah pynrem ka Ladthalaboh kala plie lad mynta iaka Rangdajied United ban long kum ka Top Team ha ka Group B kaba dang don ruh sa kawei ka jingiakhun kaba dang sah.
Ha ka jingiakhun ha Shillong, ka Jyntru kala ioh thep iaka kol ha ka minit kaba 33 lyngba u Monush Lapang hynrei hadien ka kylla step, ka Umkseh kala ioh thep 2 kol kata u Kyrshan Khongsit ha ka minit kaba 57 bad u Rangkitbok Rani ha ka 61 minit.
U Emanbha Marbaniang jongka Jyntru ula ioh ban pyniakhiad biang da kaba thep iaka kol ha ka minit kaba 66 hynrei tang hadien 6 minit u Dibasstar Rani ula ioh ban thep iaka kol bad pynlong syndon ia ka Umkseh ban long ka nongjop ha ka jingiakhun.
Ha ka jingialehkai kaba la long ha Chandmari Ground,Tura, ka Atong Matgrik kala ioh ban thep 2 kol lyngba u Chingatku N Marak ha ka minit kaba 8 bad u Brenath N Marak ha ka minit kaba 23 pyrshah iaka Warima hynrei hadien kala shah pynbam kylla da 3-2 kol.
Hashwa ban kut ka kylla step u Tremarchwal Ch Marak ula ioh ban thep ia ka kol ha ka minit kaba 26 bad 39 na ka bynta ka Warima bad hadien kane u rangialehkai ka Atong Matgrik u Vicky M Sangma ha ka minit kaba 32 namar ka jingbakla ula kum thep hi sha la kol.
Hadien kane u Vicky ula ioh ban thep ia ka kol ha ka minit ka ba 51 minit ha kaba ka jingiakhun kala iakhaid biang hynrei ha ka minit kaba 63 u Walsarang Ch Sangma ula shut ia ka bol ban leit shapoh ka kol hynrei u Brenath ula pyndei tiak ia katei ka bol bad kala leit beit beit shapoh kol ban pynlong syndon iaka Atong Matgrik ban jop iaka Warima.
