Shillong, Jymmang 25: Ka Mylliem Block Congress Committee (MBCC) ka pynrem jur ia ka jingwan shong kyllain mungor ki dkhot ka Voice of the People Party (VPP) hakhmat ka ïing sah jong u MLA ka Mylliem konstitwensi u bah Ronnie V. Lyngdoh ha ka 23 tarik mynta u bnai.
Ka kyrwoh na u President ka MBCC ubah Richard Marwein ka kdew ba ha ka jingiakren la sngewthuh ba kine ki dkhot ka VPP kila wan ban pan ia ka jingkyrshan na u MLA ka Mylliem Constituency na ka bynta ka jingiakhih jong ka VPP.
“Ha ka jingsngew ka jong ngi, lada kano kano ka kynhun kaba wan pan ka jingkyrshan ia kano kano ka kam, ym da donkam ban ia rah banner lane placard. Ka office treikam ka jong u MLA ka Mylliem Constituency ka don bad kaba ki paidbah ki lah ban ia rung ia mih ban iamir jingmut halor kano kano ka phang” la ong ka kyrwoh.
U bah Richard Marwein u pynkynmaw ruh ba ki nongialam jong ka VPP naduh kaba sdang kim kwah ban ia kyrshan bad iatrei lang bad kiwei pat ki kynhun hapoh ka liang pyrshah bad kane ka jingwan iashong hakhmat ka ing sah jong u MLA ka Mylliem ka lah ban dei kawei na ki lad jingpynkhreh election MDC jong ka party VPP.
“Na ka liang ka jong ngi bad u MLA ka Mylliem ngi wad ia ki lad ki lynti kumno ban ia weng ia ki jingeh jong ki paidbah bad ka jaidbynriew ha kaba bun ki liang na ka por sha ka por bad ngi kyntu ia ki paidbah ruh baroh ba ngin iatreilang ha ki mat baroh ki ban long ka jingkyrkhu ia ka jaidbynriew pateng la pateng. Ngi sngewdei ban pynpaw ruh ba man u briew bad man ki kynhun ki don la ka jong ka rukom trei kam watla ka thong ka long kajuh” la ong u bah Richard.
U bah Richard ula ong “Ngi la jied ia ki nong mihkhmat ba kin sngap bad kin sngew ia ka jingkhia ka jing jynjar ka jong u ba bun u balang bad ba kine ki nongmihkhmat kin ia said bad thaw ia ki ain ha ki rynsan kiba dei ia kaba ki la shah jied”.
