Nongpoh, Jymmang 25: Ka Iingkashari Special Judge (POCSO) ka Ri-Bhoi District, kala hukum ban set phatok ia 4 ngut ki runar kynthup ia kiba donkti ban leh beijot ia ki Khynnah rit hapoh ka District.
Kine ki runar ki kynthup ia u Donboklang Lapang ba khot sin u Anniaw ba na Umsning Proper-A, u Dameialamlynti Shadap ba khot sin u Bah Heh ba na Kyrdem, u Spearlinlang Pariang ba na Umktieh bad u Samson Kharhujon.
U Superintendent of Police ka Ri-Bhoi District u pyntip ba ia u Donboklang Lapang, ka Iingkashari POCSO kala hukum ban ai jingpynsajia haduh lai tylli ki hukum set phatok ba kynthup ia 7 snem bad ka kun aba T. 50,000 kat kum ka kyndon 354 B IPC, 10 snem bad ka kuna T. 50,000 hapoh ka kyndon 366 IPC bad ka jingshet phatok shirta jingim bad ka kun aba T. 2 lak kat kum ka kyndon 376 AB IPC namar ka jingleh beijot ia ki Khynnah.
Une u Heh Pulit u pyntip ba ia u Dameialamlynti Shadap pat, ka Iingkashari POCSO ka la hukum ban set along shirta jingim kat kum ka kyndon 376 (2) IPC lem bad ka kuna ba T. 20,000 bad kawei pat ka jingpynsajia ba hukum set phatok sa 2 snem bad ka kuna ba T. 20,000 kat kum ka kyndon 506 IPC namar ka jingleh beijot ia ki khynnah rit.
Haba iadei bad u Spearlinlang Pariong, ka Iingkashari u Chief Judicial Magistrate kala hukum ban set phatok haduh 2 snem kat kum ka kyndon 324 IPC bad 2 snem kat kum ka kyndon 75 JJ Act.
Ia u Samson Kharhujon pat la hukum ban set along 1 snem bad ka kuna ba T. 10,000 kat kumka kyndon 325 IPC.
