Shillong, Jymmang 25: Ka Hill State People’s Democratic Party (HSPDP) kala pynpaw ba ka jingdawa ban phiah noh ia ka Meghalaya sha ka Khasi Jaintia State bad ka Garo Land, ka dei kaba mih namar ka jingiohi lypa ia ki jingeh ki ban sa mih hapdeng ki paid Khasi-Jaintia bad ki Garo ym tang naka State Reservation Policy hynrei kiwei kiwei ki ishu ruh kumjuh.
“Ka daw bah ba ngi dawa jylla la ka jong kata ka Khasi-Jaintia State kadei namar ba ngi la iohi lypa iaki jingeh ki ban mih ym tang haba iadei bad ka bhah thungkam lane ka Reservation Policy” ong u President ka HSPDP bah K.P Pangniang haba iakren bad ki nongthoh khubor.
“Lada u paidbah u pdiang ne um pdiang ruh, ngi hap ban pyniaid shaphrang ia kane ka jingdawa jong ngi” ula bynrap.
U bah Pangniang ula kam ba lada ka jingdawa jylla la ka jong ka urlong kata kum ka Khasi-Jaintia State bad Garoland, ka jingia bhah kam ruh kan nym mih shuh namar ka bhah 80% ruh ka lah ban dei tang ki Khasi-Jaintia.
“Lada ka jingdawa Khasi-Jaintia Satte bad Garoland ka urlong, nga tharai kata ka jingiakren, katno Percent ia ki paralok Garo bad katno Percent iaki Khasi kan nym mih shuh namar la wan da kawei pat ka jingsam bhah” ula ong.
U bah Pangniang ula ong ki don bun ki jingdawa kum ka jingithuh iaka ktien Khasi haka khyrnit ba phra ka riti synshar ka ri India, kila shu sahkut namar wat ki jaitbynriew Garo ruh ki dawa ban ithuh iaka ktieng Garo.
Ula ong ruh ba ka HSPDP hadien ba ka la sdang ban buddien ia ki jingdawa ban pynrung noh ia ka ktien Khasi ha ka khyrnit ba phra jong ka Riti Synshar ka Ri, ka la iohi ba naki 38 tylli ki ba dawa hapoh ka Home Ministry, ka ktien Khasi ka la dei lypa kawei kaba hakhmat duh.
“Hynrei hangne haba ngi don 2 tylli ki jaitbynriew, ngi hap ban dawa ban ioh lang ka jingithuh bad kane ka long ka maw jynthut, nga lah ban ong” ula ong.
U bah Pangniang ula kam baka jingdawa iala ka jong ka jylla kan dei ka lynti ban pynbeit ia bun bah ki jingeh kiba don ha kane ka jylla ba ia shong khleh lang ki 2 tylli ki jaitbynriew.
