Shillong, Jymmang 24: Ka seng Hynniewtrep Youth Council (HYC) hynne ka sngi kala dawa naka sorkar Jylla ba kan pynsangeh ia ka jingthungkam biang ia u Puranjan Das kum u Chief General Manager jong ka Meghalaya Tourism Development Corporation (MTDC).
Haka shithi sha u Managing Director ka MTDC, U General Secretary ka HYC u bah Roykupar Synrem ula ong “Ngi dawa naka ophis MTDC ban pynsangeh noh mardor ia ka contract jong u Puranjan Das kum u Chief General Manager ka MTDC lem kumta, ka seng kan pynlong iaka jingiakhih namar kane ka jingthungkam biang ia u bala shongthait kadei ka buit ban pynduhkam iaki samla ka jylla khamtam kito kiba la pyndep iaki jingpule bapher bapher”.
U bah Roykupar ula pynpaw ba u Puranjan Das ula kynjoh iaka rta ban shongthait noh naduh 31.03.2023.
“Hynrei la ioh jingtip ba ka MTDC kala thungkam ontract biang ia u Puranjan Das kum u chief manager ka MTDC naduh 01.43.2023 haduh 30.09.2023 ha ryngkat ka tulop ba T. 1,57,968 shibnai bad lah ruh ban pynjlan biang iaka kam jong u haduh 6 bnai” ula ong.
U bah Roykupar ula ong ba ka HYC ka pynshah jur ia kane ka jingthungkam biang ia u briew bala shongthait bad haka juh ka por ban siew ruh daka tulop kaba heh.
“Nalor kane ka ka HYC ka sngew ban pynpaw ba kane ka jingthungkam biang ia kito kiba la shongthait kan wanrah shuh shuh ka jingkyrduh kam sa ki samla kiba wad kam” la ong u bah Roykupar.
