Shillong, Jymmang 17: Ka Voice of the People’s Party (VPP) hynne ka sngi kala dawa naka sorkar jylla ba kan pyntreikam iaka bhah thungkam lane ka Reservation Policy kat kum ka jingdon paid jong ki Jaidbynriew Khasi-Pnar bad Garo hapoh ka jylla.
Ia kane la pynbna da u president ka VPP u bah Ardent Miller Basawiawmoit haba kren haka jingshong kyllain mungor ha jaka pynieng kali ba marjan ka Additional Secretariat, ban pynbor ia ka sorkar jylla ba kan khot daka dorbar kypang ban iathir halor ka bhah thungkam lane ka Reservation Policy.
Haba kren ha kane ka sngi, u bah Ardent ula ong ba naka liang ka VPP ka ieng haka nongrim ba kam pyrshah iaka Roster System hynrei ka pyrshah iaka jingnoh shilliang ka Reservation Policy ka ba la pyntreikam mynta la 51 snem tam.
U bah Ardent ula ong ba ka VPP ka dawa pynsangeh shuwa ïa baroh ki jingpynrung kam kat bym pat lah ban pynbeit ïa ka Reservation Policy hapoh ka jylla.
Ula ong ba naduh 1972, ka jingbun paid ha Meghalaya ka bun ki Khasi bad ki tam beit da 15% haduh 17% hynrei kaba sngewlyngoh ka long, ba kane ka Reservation Policy ka pynduhnong pynban iaki Khasi kiba bun paid.
“Ka bhah thungkam lane ka Reservation Policy ka dei ban long katkum ka jingbun paid jong ki trai jylla, namar shu buh lada ngi don 50% kat ba kiwei pat ki jaitbynriew kin don 30% kam shongnia ban phiah 40-40” iaka bhah thungkam” la ong u bah Ardent.
U bah Ardent ula kam ba ka jingbun briew ki Khasi-Jaintia ka long 48% kat ba u Garo 32% bad tang lyngba ka jingdon briew, la sngewthuh lypa ïa ka jingnoh shilliang ka bhah thungkam lane ka Reservation Policy bad dei namar kane la donkam ban pynbeit ïa kane kat kum ka jingdonpaid.
“Dei ban pynshong nongrim iaka Reservation Policy katkum ka jingbun paid (Demography) bad dei namar kane donkam ban iatai ia kane ka mat haka ing dorbar thawain daka ba khot iaka dorbar kypang” la ong u bah Ardent.
U bah Ardent ula pynbna ba ka liang ka VPP ka khot ia wer ia ki paidbah baroh ban iawan ha ka 19 tarik mynta u bnai ha jaka ieng kali ja Additional Secretariat ban wan ap iaka khubor ka ban mih hadien ka jingialang All Party Meeting namar ha kane ka sngi, ka Party kan sa pynbna kumno ban iaid shakhmat haba iadei bad ka jingdawa pynbeit iaka Reservation Policy.
