Shillong, Jymmang 17 : Ka pung Umiam, kaba dei kawei na ki pung pyllang um kaba kyrshan ia ka jingpynmih bording ki Hydro electric project ka Umiam Stage-I, Stage-II, Stage-III bad kumjuh ruh ka Umtrew project, kala ring tyrkhong hi ria ha ka jingdon um bad ka um kala hiar sha u pud ba ka MeECL ka lah ban hap khang shisyndon ia ka jingpynmih bording na kine ki 4 tylli ki project.
Kumba long mynta, ka jingdon jong ka um ha kane ka pung kala kot satang 3156 phut, kaba duna tam ha ka histori jong ka Jylla bad kane baroh kala wan jia namar ka jingslem ban wan ka lyiur ne ka jingbym wan u slap kat haduh mynta.
Haba iakren bad ki lad pathai khubor, u Myntri ka tnad pynmih bording AT Mondal ula ong
“U don da u pud ha ka jingdon um ha kane ka pung, kaba ngin lah ban pyniaid ia ki hydro project ne pynmih bording hynrei lada ka um ka nang hiar nang hiar, ngim banse ban hap khang ia ka jingpynmih bording ki hydro project ha Ri-bhoi”.
U Myntri ula pynpaw ba ia mynta hi,ka Sorkar kan dang hap ban bteng ia ka jingpynlip bording elektrik. U pyntip ba ia ka Shillong bad Tura, ka jingpynlip bording kan treikam haduh 8 kynta bad ha kiwei ki bynta jong ka Jylla kan long haduh 10 kynta.
U Myntri ula ong ba ka jingpynsangeh ia ka jingpynlip bording kan wan satang lada wan hap noh u slap bad pyndap biang ia ki um ha ki pung jong ki hydro project.
Na ka liang u Myntri lem bad ki stad na ka IIT Guwahati, kila hiar jurip ia ka pung umiam ha ka 16 tarik JYmmang.
U myntri u pyntip ba ka Sorkar ka dang pyrshang ban wad ia ki lad ki lynti kumno ban lah tehlakam noh ia ka jingduna bording ha Jylla da kaba peit sha kiwei kiwei ki lad pynmih bording.
