Nongpoh, Jymmang 08 : Ka Myntri ka Koit ka Khiah Kong Ampareen Lyngdoh, hynne ka sngi Nyngkong, kala hiar jurip ia ka jingtei jong ka Maternity & Child Health Hospital (MCH) ha Niangbyrnai Parila bad ia ka Trauma Centre ha Nongpoh, kiba dang sahteng khlem pat lah pyndep mynta la bun snem.
Ka Myntri kala leit ruh ban jurip ia ka skul ki Nos GNM kaba don ha ka shnong Pahamsyiem. Ia ka Myntri la synran da u Chairman ka State Health Advisory Board Bah Mayralborn Syiem, u MLA ka Umsning Dr Celestine Lyngdoh bad ki Heh ka Tnad ka Koit ka Khiah.
Ha ka jingjurip ia ka MCH hospital bad ka Trauma Centre, ka Myntri kala lum ia ki jingtip ba donkam halor ka jingtei ia kine ki jingtei bad ia kiwei ki jingdonkam ha kaban lah pyndep noh ia ki. Ka Myntri kala buh ruh daka por ia baroh ki tnad ba dei peit ia ka jingtei ba kin pynsted noh wut wut ia ka kam khnang ba kine ki jaka ai jingsumar kin lah ban ai noh ia ka jingshakri ia u paidbah.
Haba iakren bad ki nongthoh khubor, I Kong Ampareen ila pyntip ba hadien ka jingwan jurip hi dalade, la shem ba kan dang shim katto katne por ia ka MCH hospital ba kan ai jingshakri watla ka jingtei kala dep. Ka jingshimpor ka dei namar ka jingdonkam ban pynbiang ia ka bording elektrik, ka umbam umdih bad kiwei kiwei kum ka jingthungkam thungkam.
Ila pyntip ba kum ka Myntri in sa rah iakren ia kane ka kam bad u Myntri Rangbah ka Jylla Conrad K Sangma bad in sa lum ia ka jingialang bishar kam ha ka 10 tarik u Naitung ban iakren halor ka jingpyntrei kam noh ia ka MCH Hospital.
Halor ka Trauma Centre, ila ong ba ka kam kala iaid shaid shaid khamtam ban tei ia ki ar tylli ki operation theatre. I ong ba ka jingeh ka don hangne namar ia ka building jong ka trauma centre la pyndonkam ban leh kum ka COVID centre bad ruh ka jingdon jong ka ophis u DM&HO ha kane ka building. I ong ba ia ka ophis u DMHO yn sa pynkynriah noh shen hadien ba la dep ban tei ia ka building kaba thymmai kaba don hajan jong kane ka hospital hi.
“Ngi la buddien ia ka jingiaid kine ki kam…ia mynta ka kam kala kumba 55-60% bad ngi kyrmen ba ha kine ki 2-3 bnai lada ailad ka suinbneng, ngin sa lah ban pyndep noh ia ka jingtei bad ngin sa pynkynriah noh ia ka Ophis u DMHO sha la jaka lajong” ila ong.
