Shillong, Jymmang: Ka long ka burom iaka Meghalaya ha kaba ka samla Lorenza Songthiang ka badei ka nongialehkai Martial Art na ka shnong Laitkor, ka la wanrah nam bad burom ia ka ri India hadien baka la jop bad iohkhur iaka takma Rnong ha ka World Pankration Championship ba la pynlong ha Tashkent, Uzbekistan.
Haba kren sha ki lad pathai khubor, ka samla Lorenza Songthiang kala iathuh ba kane ka World Pankration Championship ka la long naduh 30 tarik Iiaong haduh 4 tarik Jymmang 2023.
Ka samla Lorenza Songthiang kala iathuh ba ka la ioh ban iashimbynta ha ka kyrdan Senior Elite Group bad ha kane ka jingiakhun kala wan ba lai katba ia ka kyrdan ba nyngkong bad ba ar la ioh khur da ka nongiakhun ba naka ri Ukraine.
“Kane ka dei ka rynsan ka ba heh tam jong ka World of Martial Arts bad wat hadien baka la ioh khur tang ka takma Rnong hynrei ka dap daka jingsngewsarong namar kala ioh ban wanrah burom iaka ri bad iaka jylla baroh kawei” la ong ka samla Lorenza.
Ka samla Lorenza Songthiang kala iathuh baha ka por ba ka leit ban iakhun sha Tashkent, Uzbekistan, naka liang ka sorkar jylla kam shym la lah ban iarap pisa namar kane kadei tang ka jingiakhun ban shah jied hynrei mynta ka kynti naka liang ka sorkar jylla bad ka sorkar pdeng kin iarap pisa namar kala shah jied ban iakhun haka World of Martial Arts.
Kala iathuh ba haka jingiakynduh ia u myntri rangbah ka jylla u Conrad K Sangma, ula kular ban iarap pisa bad ka sorkar kala kular ruh ban shim khia ban ai ki jingiarap pisa na ka bynta ki nongleit shim bynta ha kum kine ki jingiakhun Mixed Martial Arts.
