Shillong, Jymmang 05 : Ka Tnad Meghalaya Police kala pynlong ia ka jingiasyllok bad ki Hotel ba kin pyndait ia ki kor CCTV hapoh ki phyllaw jong ki hotel bad ban pynthikna ia ka jingbuh jingthoh ia ki nongwansah ryngkat ka jingpynshisha lyngba ki ID.
Kane ka jingiasyllok ka dei kaba la khot pynlong da u SDPO ka Sadar Swapnil Pawar, IPS bad ki Trai bad Manager jong ki Hotel kiba hap hapoh ka Shillong Sadar Police Station.
Kane ka jingialang kala iakren halor ki kam bymman, ka jingshngain bad jingiada lem bad ka jingiai mih ki kam shukor lyngba ki kor internet.
Ki mat kiba la iatai ki long halor ka jingpyndait ia ki kor CCTV ha ki phyllaw jong ki hotel, ban buh jingthoh ia ki briew ba wansah ryngkat ka jingpynshai lyngba ki ID, ban ai jingtip lada don ki briew ba ishankhmat ne ki tiar, ki sienjam ban iada bad kumno ban pyntip ia ki kam thok kam shukor lyngba ki kot internet bad kiwei kiwei.
Ha kane kajuh ka sngi, ka Nongmensong Taxi and Driver Association kala pynlong ia ka jingialap pyrshah ia u drok ha Nongmensong Dorbar Hall ha ka jingiadon lang u Bah M Marngar, MPS, DySP Traffic, Insp S Dasgupta, IC Rynjah ka Traffic Branch lem bad ki Dkhot ka Seng Longkmie, ki Dkhot ka FKJGP bad kiwei kiwei.
U M Marngar, ula kren halor ki jingktah jong u droks bad kumno ban iakhun pyrshah ia une u jingdih basniew. Hadien lane la pynlong pat ia ka jingiasyllok ban weng ia ka jingartatien ba kumno ban iatreilang bad ki Pulit bad ban iarap ha kaban iadonbynta lang ha ka jingiakhun ia u droks.
Kumjuh ruh da ka jingthmu ban khanglad ia ka jingdie kyiad sha ki Khynnah, ki Pulit ka Laitumkhrah hynnin ka miet kila pynlong ia ka jingkhynra ha sawdong jong ka Iew Laitumkhrah bad ioh kurup haduh 17500 ml ka kyaid IMFL.
