Nongpoh, Jymmang 4: Ka Voice of People Party (VPP) kala byrngem ba kan sa sdang ia ka jingiakhih paidbah ha Ri-lum Khasi Jaintia hadien ba kala pyndep ia ka jingpynsngewthuh paidbah halor ka jinglah shiliang jong ka State Reservation Policy ka Jylla bad ka jingktah jong ka Roster System ia ka Jaidbynriew Khasi Jaintia.
Ia kane la pyntip da u President ka VPP Bah Ardent Miller Basaiawmoit ha ka jingialang pynshai paidbah halor ka Reservation Policy kaba long hynne ka sngi ha Iew Mawlong, Nongpoh haka jingïadonlang da u Dr R. Syngkon General Secretary ka VPP, ki nongkitkam ka Seng VPP bad kiwei kiwei ki riew rangbah bad ki paidbah ki ba la wan ban sngap ïaka jingïalang.
Haba kren ha katei ka jingïalang u bah Ardent u la ïathuh ba ka Seng VPP ka ïeng skhem halor ki jutang ki ba la khlei ha shwa ban long ka election. Wat la ka VPP ka jop tang 4 ngut kam tieng ban ïatai nia ha assembly bad ïeng ban ïaleh naka bynta ka jingmyntoi u paidbah.
U la ïathuh ruh ba ka VPP ka ïeng skhem ban ïakhih ïakane ka rukom thung kam thung jam hapoh ka jylla namar ka la noh shilliang haba ïa nujor hapdeng u khasi bad Garo. Bad Kane ka jingwan jong ka VPP ka dei ka wat ka baar ban ai ka jingpynshai sha ki paidbah shaphang ka Reservation Policy.
U la bynrap ba ka VPP kan sa leit ruh sha kiwei kiwei ki shnong ban pynshai shaphang kane ka mat bad hadien kane kan sa pynlong ka jingïakhih ha kaba ïadei bad ka jinglong jingman jong ka jylla halor ka jingthung kam thung jam.
Shuh shuh u la ïathuh, ka VPP ka la ïatai hapoh ka ïing dorbar halor ka Reservation Policy bad u la ong ba ka jingïatai jong ka VPP halor kane ka policy kam dei ba ka bishni ïano ïano hynrei dei namar ba ka jingthung kam thung jam hapoh ka jylla ka sorkar kam shem la ïaid katkum ka policy ba la buh bad mynta la hap ban pyntrei kam daka Roaster bad dei hangne ba mih ki jingeh ba lada lait kam 10 tylli 7 lane 8 la ïoh da kiwei bad kaba tam ïoh u khasi jong ngi, ong u bah Ardent.
