Guwahati, Jymmang 04 : Kawei ka Khynnah 12 snem kala shah leh beijot bad shah pyniap ha ka shnong Margherita, kaba hap hapoh ka Tinsukia District bad ia ka metiap la lap hynnin ka janmiet sngi Balang na kawei ka thliew painkhana (septic tank).
Kat kum ka khubor Pulit, kane ka Khynnah kala shah beijot bad hadien la pyniap ia ka shuwa ban bret hapoh ka septic tank.
“Kane ka khynnah kala mih na iing ban leit peit ia ka jinglehkmen Bihu ha ka 30 tarik Iaiong hynrei namar ka jingslem ka jingialehkmen, kane ka khynnah kala sah ha kawei ka Iing jong u Anand Tanti, ka iing kaba ia ithuh ithaw bha. U Anand Tanti ula shim kabu ia kane ka khynnah bad ula leh beijot, pyniap bad sa bret ia ka met hapoh ka septic tank” ong ki Pulit.
Halor kane ka jingjia,ki Pulit kila kem ia ka kurim u Anand Tanti bad kala phla ba u Kurim jong ka, ula leh ia kane ka kam bymman.
Ka jinglong jingman ha Margherita kala thnem bha hadien ka jingiohtam ia ka metiap bad ki paidbah kila mih nala ki jong ki IIngsah ban pynpaw ia ka jingpyrshah halor kane ka jingjia ba sngewtriem.
Kane ka jingiohtam ia ka metiap kala wan jia hadien ba ki bahahiing kane ka Khynnah kila leit ujor sha ki Pulit ba ka Khun kala jah rngai.
“Halor kane ka jingjia, ngi la pynlong ia ka jingtohkit kaba bniah bad ha ka janmiet sngi Balang, ngi la lap ia ka metiap jong kane ka khynnah na ka septic tank jong ka IIng u Anand Tanti” ong ki heh Pulit.
Ki Pulit kila pynkit ia ka met sha Hospital ban leh ia ka post mortem. Ka jingthwet ban ioh kem ia u Anand Tanti kala iaid shakhmat.
