Shillong, Jymmang 03 : Ki 4 ngut ki Nongtih par dewiong kiba dang shu ioh ia ka mining lease na ka Sorkar India, kila pynkup burom ia u Myntri Rangbah ka Jylla Conrad K Sangma, hynne ka sngi Balang ha Nongstoin, namar ka jingshimkhia ban iakhun ha kaban pyllait ia ka Jylla na ka hukum khang tih dewiong jong ka National Green Tribunal (NGT) kaba la jan kynjoh mynta sha ka 9 snem.
Haba iakren bad ki nongthoh khubor hadien ka jingialang, u Myntri Rangbah ula ong ba ka jingioh sdang biang ban tih dewiong kan dei ka khyllipmat ban sah jingkynmaw ia ka Jylla bad ia ki nongshongshnong kiba shaniah ha ka kam dewiong ban kamai jakpoh hadien bala khang ia ka jingtih ia une u marpoh khyndew la jan shiphew snem.
The project proponents conducted a program today in Nongstoin to thank the Govt. of Meghalaya for the support in the last 5 years that has resulted in the lift on the ban on coal mining for almost 10 years & to start the process of scientific, safe & sustainable mining.
— Conrad K Sangma (@SangmaConrad) May 3, 2023
“Ka dei shisha ka khyllipmat ban sah jingkynmaw namar la jan shiphew snem, ki nongshongshnong ka Jylla khamtam ki nongtih par bad ki briew kiba shaniah ha ka kam tih dewiong, kila mad ia ki jingjynjar la bun bun snem. Ym tang ki paid bah hynrei wat ka Sorkar kala duhnong bha haba phai sha ka jingpynmih pisa bad ka khajna” ong u Conrad.
U Conrad ula bynrap ba da ka jingai ia ka mining lease na ka Ministry of Coal, ka Sorkar India, ki jingkylla kin sa sdang ban wan hapoh ka Jylla bad ka jingtih dewiong kan sa long noh da ka jingstad saian ka ban sa poi sha u pud kumba ju long baroh shikatta hashuwa ka hukum ka NGT.
U Conrad ula pyntip ba ki 4 ngut ki nongtih par kiba la ioh ia ka mining lease kin hap pat ban aplai ia ki jingbit napoh ka Jylla kynthup ia ka Forest Clearance/Environment Clearance bad ha ryngkat ka jingiasyllok bad ki paidbah yn sa lah ban sdang noh ia ka jingtih dewiong da ka jingstad saian.
“Ka jingtih dewiong kan ym long tang ia kine ki 4 ngut hynrei hadien habud, kiwei ki nongtih par ruh kin hap ban bud ia kajuh ka nuksa khnang ba kin lah ban ioh jingbit ban tih dewiong da ka jingstad saian bad ba long kat kum ka ain” ula bynrap.
Haba iaroh ia ka Sorkar India, u Conrad ula ai khublei ia u Myntri Rangbah Duh ka Ri Narendra Modi, Myntri ka Ministry of Coal Pralhad Joshi namar ka jingai jingkyrshan ban pynthikna ba ka jingtih dewong kan sdang biang ha Jylla Meghalaya da ka jingstad saian bad ha ka lynti kaba shngain.
