Guwahati, Jymmang 03 :Ka Assam Pradesh Congress Committee (APCC) hynne ka sngi Balang, kala ujor da ka ejahar pyrshah ia u President ka AIUDF Badruddin Ajmal namar ka jingkynthoh pynthoh bria pyrshah ia ka Congress Party.
Ha ka ejahar, u Nongialam ka Congress na Assam Monojit Mahanta ula kam ba u Ajmal dang shen ula kynthoh pynthoh bria hakhmat u paidbah da kaba ong “Thakur ne hizron dal banaya (U Blei ula shna ia ka kynhun ki eunuch), ka jingkynthoh bala thew sha kane ka party kaba rim duh”.
Lah ban kdew ba shuwa kane u Badruddin Ajman ula kren jot pyrshah ia ki Kynthei ka Assam bad ia u Myntri Rangbah ka Assam.
“Ngi pyndait lang hangne ia ka kot khubor ka Amar Asom ba pynmih ha ka 3 tarik Jymmang, kaba pynmih ia ka jingkren jong u. U Badruddin Ajman, MP bad President ka AIUDF ula iai bteng ban pynjah burom bad pynthohbria ia ka ktien ka thylliej jong ngi, ka riti dustur bad kiwei kiwei bad ruh ula pyrshang ban pyntroin ia ka dustur ka imlang sahlang ki Assamese” ong ka ejahar.
Mynshem snem, u Ajman ula kynthoh da kaba ong ba ki shynrang Muslim kila iashong kurim tang mar syn kynjoh ia ka rta ba 21 snem kat kum ka ain, hynrei ki Hindu ki shong samla tad haduh ka rta ba 40 snem ban ioh shong kurim beain ia kumba lai ngut ki kynthei.
