Nongpoh, Jymmang 01: Namar ka jingsngewkhia kaba jur halor ka jingkylla kaba syndet jong ka mei mariang lane ka jinglong jingman jong ka suinbneng (Climate Change), kaba la ktah jur ia ki nongrep, ka ICAR, Agricultural Technology Application Research Institute Umiam, ka la pynlong da ka jingiatai kaba kyrpang lane ka Annual Review cum Action Workshop of NICRA-TD halor ka phang kumno ban pynmih ia ki lad ki lynti ban pynduh ia ki jingeh jong ki nongrep.
Ia kane ka prokram kaba ar sngi la pynlong ha ka 28 bad la pynkut ha ka 30 tarik u laiong, ha kaba la wan ban shimbynta da u Bah Vincent H Pala, MP ka jylla kum u kongsan ha ka jingiadonlang ruh ki ophisar bad scientist napoh ka tnad ICAR lem bad palat 50 ngut ki nongrep na Ri Bhoi District.
Haba kren ha kane ka sngi, u Ma Vincent H Pala kum u nongmihkhmat paidbah sha ka Parliament, u la ai ka jingiaroh ia ki bor pyniaid ka ICAR khamtam ka tnad kaba dei peit bad khmih halor ka rep ka riang, kaba la shimkhia ban pynlong ia kum kane ka prokram ban ia tai ne ai jingtip jingnang halor ki lad ki lynti kumno ban lah ban iarap ia ki nongrep kiba ju im jakpoh na kane ka kam rep haba lyngshop ka jingkylla ha ka suin bneng.
U la ong, ka dei shisha kaba donkam ban iatai ia kane ka phang ba la wanrah da ka tnat ICAR namar la sakhi ia ka jingkylla ha ka rukom long rukom man jong ka suin bneng ha kine ki khyndiat snem.
