Lada pyntreikam ia ka Roster System naduh ki snem bala leit
Shillong Iaiong 23: Ka Khun Hynniewtrep National Awakening Movement (KHNAM) haka Sngi u Blei, kala pynpaw ba lada ka sorkar jylla kala rai ban pyntreikam iaka Roster Synstem naduh ki snem kiba la leit ne ‘Retrospectively’, ka hap ban pynthikna ba ka roster registers & roster accounts ka dei ia ka ban pynkhreh thik pa thik bad katkum ki kyndon jong ka Rule.
Ka KHNAM kala phah ia ka dorkhas halor katei sha u Myntri Rangbah ka jylla u Conrad K Sangma ba un tuklar bad la phah kopi ruh sha ki seng saiñ pyrthei kiba kynthup iaka NPP, UDP, VPP, HSPDP, PDF, BJP, AITC bad Congress.
U Vice President ka KHNAM u Bah Thomas Passah ula ong ka sorkar kan donkam ruh ban pynlong mamla ruh iaka MPSC bad kiwei kiwei ha ka jingpynkhreh iaka roster register da kaba bthah ba kin pynmih biang iaka resol naduh u snem 1972-2022 bad ban phiah ruh ia ki kyrtong ba shah jied.
Ula ong, da kaba bud ia katei, ki tnad sorkar kidei ban pynkhreh iaka roster registers & roster accounts kaba dei da kaba rekod ia ki jingtip kiba la pynbiang da ka MPSC ne kino kino ki bor thungkam jong ka sorkar.
“Ban kiar ia ka jingpynheh ia ki kam kiba lait ki bym pat thep briew, dei ban pynthikna ba ki jingtip bad ki jingai jingkhein ha kaba iadei bad ka jingthungkam ia kiwei pat lyngba ka 15% Unreserved Category ym dei ban pynrung lang haka Reserved Category jong ki Khasi-Jaintia/Garo bad kiwei pat ki riewlum”.
Ula ong, lada ka sorkar kam lah ban pynbiang ia kitei baroh kumta kadei ban pynsangeh iaka jingpyntreikam iaka Roster System naduh ki snem kiba mynshwa hynrei ban sdang pyntreikam noh nangne shakhmat kata naduh u snem 2023 shaneng.
“Ki sienjam kiba la shim ha ka jingpynkhreh iaka roster registers & roster accounts ka long kaba don jingdkoh bad jingbakla namar ym shim la niew ia ka jingshisha ba la bun snem mynta, kiba bun ki samla kiba la iohkam lyngba ka Unreserved/Open Category kidei na ka jaidbynriew Khasi-Jaintia, hynrei ka rukom pynkhreh ia katei ka kam, la khein ba baroh ki nongtrei Khasi bad Jaintia kila shah thungkam lyngba ka 40% reserved quota bad ym shim la don satia ki nongtrei Khasi-Jaintia kiba la shah thungkam lyngba ka UR/Open category” ong u Bah Passah bad kane kala pyni kumba ki Khasi bad Jaintia kila ioh bun naka bhah kaba la mang ia ki.
U Bah Passah ula ong dei ban pynkhreh iaka roster registers & roster accounts kaba paka bha khnang bay n lah ban pyni shai kdar iaka jingdon ki kam kiba lait bad ban lah ban bhah lang sha baroh ki nongaplai kam, ia kaba ym shim la leh ne pyndonkam da ki tnad sorkar, lehse namar ka jingbym don ia ki jingtip ne ki jingkhein kiba thikna haka jingpynmih iaka result da ka MPSC bad kiwei kiwei naduh u snem 1972 haduh u 2022.
