Aipor 45 sngi ban tehlakam ia ki jingpynjot ia ka Wah Umkhen
Shillong, Iaiong 14 : Ka Sorkar Jylla kala ithuh haduh 32 tylli ki jaka ha shilynter ka Wah Umkhrah bad Umshyrpi, ban buh ia ka Sewage Treatment Plant (SWT) haba rai ruh ban buh da ka kuna kaba heh pyrshah ia ki briew kiba pyntuid bad bret jakhlia sha kine ki Wah.
Ka Sorkar kala aipor ruh 45 sngi ia ki bor ba dei khmih ban shim ia ki sienjam ha kaban tehlakam ia ki ka tih mar poh khyndew ha ka Wah Umkhrah, ka ban sa long ka tyllong um ba kongsan na ka bynta ka New Shillong Township.
Ia kane la pyntip da u Chief Secretary ka Jylla Bah DP Wahlang hadien ka jingialang ban pynkhuid bad pynim ia kine ki lai tylli ki Wah ka Shillong ha ka jingiadonlang u Myntri Rangbah ka Jylla Conrad K Sangma bad u Symbud Myntri Rangbah ba khmih ia ka tnad pynroi sor Bah Sniawbhalang, kaba long hynne ka sngi thohdieng.
Ki Kynhun bapher bapher kynthup naduh ki Khlieh Nongsynshar Shnong haduh ki Seng kila wan ban iashim bynta ha kane ka jingialang, kaba la iakren ruh halor ki kyndon ba treikam jong ka hukum bala pynmih ka National Green Tribunal (NGT) ba iadei bad ka jingpynkhuid bad pynim ia kine ki Wah.
“Ka jingpynleit jingmut hi ka long halor ka jingiatynrong lem ia ka jingkitkhlieh bad ban iatreilang da kawei ka jingthmu bad kata ka longban pynkhuid ia ka Wah Umkhrah, Umshyrpi bad ka Umkhen, ka ban long ka tyllong um ba hadien habud jong ka New Shillong” ong u Bah Wahlang haba iakren bad ki nongthoh khubor.
“Ka jingialang ka long kaba sngewtynnad bad ngi la mynjur lang da kawei ka jingmut ban gin iatrei lang bad ki agency bapher bapher bad ki kynhun seng bad ki Rangbah Shnong bad nga thikna ba ngin sa iohi shen ia u soh” ula bynrap.
Haba kylli ia ka sienjam bala shim ban khang ia ka jingpyntuid ia ki um bad jahkhlia sha ki wah, u Bah Wahlang ula ong ba ha ka jingkren jong u haoh ka jingialang, ula pyni ia ki dur bala shon na ka drone jong ka Wah Umkhrah kaba long naduh ka tyllong haduh ka thain Mawlai bad ruh ia ka Umshyrphi naduh ka tyllong haduh ka jingkieng Umshyrpi bad “Hangne ngi la iohi ia ki sakhi halor ka jingpyntuid jakhlia sha ki wah”.
U ong ba ka jingialang ba nyngkong eh halor kane ka kam ka dei kaba la pynlong ha ka 6 tarik Iaiong ha kaba la rai halor ka jingdonkam ban iakren bad baroh ki kynhun ba iadonbynta ha kane ka kam na ka bynta ban wanrah ia ka jingiatreilang ha kaban weng ia kane ka jingeh.
“Bad naduh kane ka taiew bala leit noh ngi la pynjari da ka kuna kaba heh bha. Kino kino kiba pyntuid jakhlia sha ki Wah bad lada don kino kino ki iing ki ba don ia ki septic tank kiba sniew lane ki bym treikam, ki dei ban maramot hapoh ka 10 sngi, lem kumta kin ngat ha ka kuna ba T. 500 sngi sngi tad haduh ba kin da khang ia ki septic tank lane pynthikna ba ka jakhlia kan ym tuid shuh sha kine ki wah” ula ong.
U Chief Secretary ula pyntip ruh ba ka hukum ka NGT kala bthah ia ka jingdonkam ban pynthikna ba ym dei shuh ban pyntuid ia ki um jakhlia sha ki Wah.
“(Namar kane), ngi la ithuh ia 32 tylli ki jaka- 20 tylli ha shilynter ha Wah Umkhrah bad 12 tylli ha ka wah Umshyrpi bad la tip ia ki kum ki fall-off area ia kaba ngi donkam ban buh ia ki Sewage Treatment Plant bad san tylli kila don hapdeng ka jingtreikam bad ngi dang peit jaka ia kiba sah. Lada ioh ia ki jaka sorkar ngin buh beit ia ki STP bad lada ngim ioh, ngin pan ia ka jingtreilang jong ki Dorbar Shnong ba kin ai jaka ha kaban buh ia ki STP kat kum ka jingbthah jong ka NGT” ula ong.
Haba phai sha ka wah Umkhen, u Bah Wahlang ula ong “Ngi don ia ka jingeh naduh ka tyllong bad ngin sa leh eiei halor ka jingtih marpoh khyndew ha kane ka thain. Ngi la aipor 45 sngi ban shim ia ki sienjam ha kaban pynbeit ia kane ka jingeh hapoh ka wah Umkhen”.
Ha kajuh ka por, u Chief Secretary ula pyntip ba T. 110 klur la buh lah dep ban buh lypa ban pynlut ia kane ka kam kat kum ka jingbthah ka NGT n aka bynta ban pynkhuid ia ki shnong ki thaw ha sor Shillong.
