Shillong, Iaiong 11 : Ka Election Commission kala mait kyrteng ia ka All India Trinamool Congress (AITC) bad ka Nationalist Congress Party (NCP) ban ioh jingithuh kum ki National Party hapoh ka Ri haba ai jingithuh ruh ia ka Voice of the People Party (VPP) kum ka State Party ka Jylla Meghalaya.
Nalor ka AITC bad ka NCP, kiwei pat ki party kiba la duh ia ka jingithuh kum ki National Party ka dei ka Communist Party of India (CPI).
Haba phai sha ki State Party, ka VPP ba ialam da u MLA ka Nongkrem Bah Ardent M Basaiawmoit, kala ioh ia ka jingithuh kum ka State Party hadien ka jingjop haduh 4 ngut ki kyrtong ha ka elekshon MLA-2023.
Nalor ka VPP, kiwei pat ki party kiba ka ECI kala ai jingithuh kum ki State Party ki dei ka Lok Janshati ha Nagaland bad ka Tipra Motha ha Tripura.
Ka ECI kala shim ia kane ka rai kat kum ka jingshong bishar ia ka jingjop jong kine ki party ha ka elekshon Lok Sabha u snem 2014 bad 2019 bad ki 21 tylli ki State Assembly elekshon naduh u snem 2014.
Ka Aam Admi party (AAP) kaba la ioh ia ka jingithuh kum ka State Party ha ki saw ne palat tylli ki Jylla, kala ioh mynta ia ka jingithuh kum ka National Party ka Ri.
Ka AITC nalor ka jingduh ia ka jingithuh kum ka National Party, ka ECI kala pynduh ruh ia ka jingithuh ia kane ka party ka Mamata Banerjee kum ka State Party ha Jylla Manipur bad Arunachal Pradesh watla ka dang iai bteng ban long ka State Party ha West Bengal bad Tripura bad kaba dang shu ioh jingithuh kum ka State Party ha Meghalaya namar ka elekshon MLA 2023.
Ha ka jingbishar, ka EC kala shem ba ka TMC kam shym la iakhun satia ia ka elekshon Lok Sabha 2019 na Arunachal Pradesh bad Manipur bad kala ioh tang 0.40% bad 43.28% ka vote ha Tripura bad West Bengal. Ha ka elekshon MLA naduh 2016 haduh 2018, ka jingioh vote kane ka party ka long 44.91 ha West Bengak, 1.41 % ha Manipur bad 0.30% ha Tripura. Ha ka elekshon ba dang shu dep, ka party kala ioh 48.02% ka vote ha West Bengal (2021) bad khlem iakhun satia ha Manipur (2022).
Pule lang ia kane: Kurup ki BSF ia bun bah u kwai Burma, kem 4 ngut
