Shillong, Iaiong 03: Ki paid nongshongshnong ka Mukroh,West Jaintia Hills kila dawa na ka sorkar jylla ba kan pynbit pynbiang noh iaka jaka sah jong ki pulit kiba ap pahara hapoh ka shnong ban lait na ka jingwan thombor ki bor Assam.
Lah ban kdew ba ka sorkar jylla dang shen kala pynkha iaka Out Post ka ba don ha Mukroh bad ia kane ka Out Post la peit da ki 6 ngut ki pulit ka Meghalaya kiba ap bad pahara ha kane ka jaka.
La iohi ruh ba ia kane ka Out Post la shu tap da ki tin bad la ker pat da ki tarpal bad kane ka buh jingeh bha iaki Pulit khamtam mynta ba la poi sa ka lyiur.
La iathuh ba kane ka jingbym biang ka jaka pahara (Out Post) ka buh jingeh iaki Pulit khamtam mynta ba lah dei kapor slap bad jur ka lyer namar ki Pulit ki hap ban shu thiah ha madan bad lada jur slap ka um ruh ka iaid lyngba ka jaka ba ki thiah.
Naka liang ki pulit kiba ap pahara ki ka kyrpad ia ka sorkar ba kin leh bad shna kham bha ia ka jaka sah (Out Post) jongki khnang ba kane ka jaka sah kan ai jingshngain bad ban iada iaki na u slap, lyer bad phria ha kine ki sngi ban wan.
Haba iakren bad u Assistant Rangbah Shnong ka shnong Mukroh bah Michess Maskut ula pynpaw ba ki paidbah ki kmen ba don ki Pulit ka jylla kiba ap pahara ha shnong namar kane ka ai jingshngain iaki hynrei ki dap daka jingsngewsih ban iohi ba ka jaka sah (Out Post) jong ki Pulit ka long kaba duna nadong shadong.
U bah Michess ula ong ba ka jingdon ki Pulit ha Mukroh ka wanrah biang iaka jingsngew shngain bad ki paidbah khamtam ki nongrep ruh kila kham shngain ban leit sha ki jaka rep ne ki lyngkha khamtam mynta ba ka lah dei ka por ban kheit bad die mar rep kum u synshar.
“Ka jingdon ki Pulit ka Meghalaya ha Mukroh ka ai jingshngain ia ngi ki nong shong shnong hynrei ngi sngew synei ba ka jaka sah (Out Post) jong kine ki Pulit kam long kaba biang lane kaba pynshngain iaki bad dei namar kane naka liang ka shnong ngi kyrpad iaka sorkar ban pynbit pynbiang iaka jaka sah jong kine ki pulit kiba pahara ha kane ka Out Post” la ong u bah Michess.
Lah ban kdew haduh 5 ngut ki riew paidbah na Mukroh Meghalaya bad uwei Forest Guard ka jylla Assam ki la duh iala ka mynsiem haka jingjia kaba la jia haka 22 tarik Naiwieng 2022.
