Shillong, Iaiong 03 : Ka Khasi Student’s Union (KSU) hynne ka sngi Nyngkong kala phah ia ka khubor ba tyngeh halor ka jingkynnoh shah thombor ki paid Khasi ba sah ha ka shnong Khedagar, ka shnong ki Khasi ha Manipur hynnin ka Sngi U Blei.
Hadien ka jingioh jingtip da ka KSU halor ka jingjia ha ka shnong Khedagar, u General Secretary ka KSU Donald Thabah ula pyntip ba ka Seng kala iakren ia kane ka kam bad ka All Manipur Student’s Union (AMSU) ba kan tehlakam.
Une u Nongialam ka KSU u pyntip ba ka AMSU kala kular ban sa shimkhia bha ia kane ka kam bad kan nym ailad ba ka jingthombor ia ki paid Khasi kan dang iai bteng ha kane ka Jylla.
Hynrei, lada ka jingthombor ka dang iai bteng ia ki paid Khasi ba sah ha Manipur, ka KSU kan leh da kaba tyngeh ia ki briew kiba donkti, maham une u Nongialam ka KSU.
Lah ban kdew hangne ba ka KSU kala iakynduh ia u Myntri Rangbah ka Manipur N Biren Syiem ha ka 6 tarik Jymmang 2022 ha Imphal halor ka jingle shiliang ia ki paid Khasi kiba sah ha shnong Khedagar. U Bah Donald ula ban jur ruh hakhmat u Myntri Rangbah ka Manipur ban pynthikna ia ki lad jingiada ia ki paid Khasi na kino kino ki jingbyrngem byrsit.
U Bah Donald ula pynrem jur ia ka jingleh jong ka Tnad Forest ka Manipur, kaba la pynieng ia ka signboard ba khang ia ki Khasi ban rep hala ki jong ki jaka bala kurup da ki Bengali bad ki Meitei.
Ula ong ba ki Khasi ha Manipur kila im ha kane ka shnong naduh ka por shuwa ban ioh ia ka jinglaitluid ka Ri India (1939-1040) ia kaba la jer kyrteng ruh ia ka shnong kum ka Khedagar Khasi Village.
