Agartala, Lber 24: Ka Bar Council ka Tripura hynnin ka sngi Palei ka la pynrem jur ia ka jingkren kynthoh pyrshah India jong u Myntri ka sorkar pdeng uba khmih ia ka tnat Law and Justice, u Kiren Rijiju pyrshah ia ki nongbishar kiba la shongthait bad kam ba kane ka dei ka jingpyrshang jong ka sorkar ban tuklar ha kaba iadei bad ki jingtreikam jong ka iingbishar.
U ‘nongsaid ain ba la rim uba dei ruh u President jong ka Tripura Bar Council, u Purushottam Ray Barman u la ong ba katei ka jingkren kynthoh jong u Rijiju kalong kaba pynhiardor shibun ha kaba u la pynpaw ia ki katto katne ngut ki nongbishar kiba la shongthait jong ka Supreme Court bad High Court kum ki nongialeh pyrshah ri.
Ha ka 18 tarik mynta u bnai haba kren ha kawei ka jingialang u Rijiju u la kam ba ki don katto katne ngut ki nongbishar ba la shongthait bad katto katne ki nongtrei kam bhalang kiba long ka bynta jong ka kynhun runar kiba ieng pyrshah ia ka India kiba la pyrshang ban pynlong ia ki iingbishar jong ka ri India ba kin shim ia ka bynta jong ki party liang pyrshah.Une u myntri ka sorkar pdeng la ong ba u la maham ruh pyrshah ia kito kiba trei ban ieng pyrshah ia ka ri ba kin ngat ha ka jingeh.
Haba kren sha ki lad pathai khubor, u Ray Barman u la ong ba ka sorkar pdeng ka la pyrshang ban banbor ia ki iingbishar da kaba khang pyrshah ia ki nongbishar barim ba kin kren pyrshah ia ki jingshim rai jong ka sorkar.
Ka long kum ka jingbyrthen ia ki nongbishar kiba la kyntait ban pyndem hakhmat ka sorkar, ong u Barman uba la bynrap ba ka sorkar pdeng ka la leh ia ki kam synshar donbor ha ka ri baroh kawei.
“Ka sorkar pdeng ka la pyrshang ban kurup ia baroh ki jingtreikam kiba iadei bad ka synsharpaidbah kaba kynthup ia ka tnat iingbishar.Ka sorkar ka kwah ba ka Supreme Court bad baroh ki iingbishar kin hap hapoh ki kti ki jong ka, kata ka sakhi kaba la paw shai kdar lyngba ka jingkren jong u Vice-President bad Chairman ka Rajya Sabha, u Jagdeep Dhankhar,” on u president ka Bar Council.
Shuh shuh u Ray Barman u la thoh ruh sha u Chief Justice ka Supreme Court u D.Y Chandrachud bad sha kiwei pat ki dkhot jong ka iingbishar ban kyrpad na ka bynta ban thung ia u Chief Justice ba pura jong ka iingbishar Tripura High Court bad ruh ban pyndap ia ki post bathylli jong ki nongbishar hapoh ka iingbishar High Court.
