Shillong, Lber 24 : U Myntri Rangbah ka Jylla Conrad K Sangma, hynne ka sngi thohdieng ula ong ba u Lamphang ula pynsangeh ia ka Dorbar jong ka Dorbar Mang tyngka hynne shiteng sngi kat kum ka Rule.
“….ka rule book kala kdew shai ba ha ka sngi thohdieng, ka Iingdorbar kan treikam naduh ka por 10 baje mynstep haduh 12 baje shiteng sngi” ong u Conrad haba iakren bad ki nongthoh khubor.
Kane ka jingkynthoh u CM kala mih hadien ka jingpynpaw ia ka jingpyrshah jong ka Voice of the People Party halor ka jingaipor haba byrngem ruh ban mih sha surok halor ka kam ba iadei bad ka jingpyntreikam ia ka roster system jong ka bhah thungkam thungjam ha Jylla.
Pule lang ia kane: Shah mait kyrteng u Rahul Gandhi kum u MP ka Lok Sabha
“Katto katne ki Liang Pyrshah kiba ban jur la bun sien halor ka rule bad ong ba dei ban bud ia ka rule bad kane ka dei kaba u Lamphang ula leh. Ula iaid kat kum ka rule, kat kum ka rai jong ka Business Advisory Committee (BAC) bad baroh ki mat kiba la kdew ki dei kiba la pynshong nongrim na kane” ula ong.
U Myntri Rangbah ula ong ba ki don bun ki khep ba ki Liang Pyrshah ki lah ban kren halor kane ka kam (roster system).
“Kan don ka jingiatai halor ka jingkren u Lat, kan don ka jingiatai halor ka mang tyngka, ka lah ban don ka special motion, ka lah ban don ha jingiatai ba lyngkot-ki don bun ki lynti. Namar kata, ki dkhot kiioh laitluid ban pynsngew ia kano kano ka kam ha kano kano ka por” ula bynrap.
Halor ka jingkynnoh ka VPP, u Conrad ula ong “….baroh ki kam kiba la wanrah, ngi ju iakren beit ia ki, ngim ju kiar ialade na kine bad hadien habud ruh ngin nym kiar ialade ban iatai ia kano kano ka kam”.
