Shillong, Lber 21: U MLA ka United Democratic Party (UDP) na Mokaiaw konstitwensi u bah Nujorki Sungoh hynne ka sngi ula pyntip hapoh ka ïng dorbar ba ka sorkar Assam kala ka nang pynheh shuh shuh iaka ophis Forest hapoh ka shnong Mukhroh ia kaba la tei beain ha u pud u sam ka jylla Meghalaya.
Haba shim bynta haka jingiatai iaka jingkren u Lat ka jylla u bah Nujorki ula kynnoh ba ka sorkar Assam kam ju burom mar kylliang hynrei ka iai pyni bor pyrshah iaki paidbah nong shong shnong ka jylla Meghalaya kiba don ha ki thain khappud.
U bah Nujorki ula pyntip ba ka sorkar Assam haka jaka ban burom mar kylliang hadien ka jingshah siat iap ki paidbah ha Mukroh, hynrei ka nang pynheh shuh shuh iala ka ophis Forest iaka ba la tei beain ha Mukroh kaba dang hap ha Meghalaya.
“Haka jaka ban weng iaka ophis Forest kaba don ha Mukroh Meghalaya, ka sorkar Assam ka dang pynkhlain shuh shuh ia kane ka ophis, da ka ba tei iaki kynroh, da ka ba wanrah briew shuh ban don ha kane ka ophis” la kynnoh u bah Nujorki.
U bah Nujorki ula dawa naka sorkar jylla ban leh ei pyrshah ia akne ka jingpyni bor ka sorkar Assam ha ki thain khappud bad ula dawa ruh ba ka sorkar Meghalaya kadei ban wanrah ki lad jingiada ban ai jingshngain iala ki para doh para snam kiba sah ha ki thain khappud bad ka Assam.
Nalor kane u MLA ka Mokaiaw ula kyntu ruh iaka sorkar jylla ban pynthikna ba baroh 36 tyli ki shnong kiba don hapoh Block I kidei ban poi biang sha Meghalaya namar haduh mynta mynne ki paidbah kiba im hapoh Block I ki mad shibun ki jingeh.
U bah Nujorki ula pyntip ba namar iaka Block I la pynhap kum ka jaka iakajia, ki paidbah nong shong shnong ki shem jingeh namar ka thain kam don ki kam pynroi watla kila im hapoh kane ka thain da ki phew phew snem.
Pule lang ia kane: Shna ka Tnad Agriculture ia ka Portal ban buh ryntih ia ka dor ki marrep
