Shillong, Lber 20 : U Nongialam ka All India Trinamool Congress (AITC) Dr Mukul Sangma hynne ka sngi nyngkong, ula ong ba ka rai jong ka Voice of the People Party (CPP) ban mih jyndat na Iingdorbar Thaw Ain ha ka por ba ai jingkren u Lat ka dei ka jingpyni shai iala ka jong ka jingsngew.
Ki 4 ngut ki MLA ka VPP kila mih jyndat ban pynpaw ia ka jingpyrshah ia u Lat ka Jylla Phagu Chauhan namar ka jingai jingkren sha ki Dkhot ka Iingdorbar da ka ktien Hindi ha ka sngi sdang jong ka Dorbar Mang tyngka hynne ka sngi.
Kat kum ka jingong u Dr Mukul, ki seng sain pyrthei bapher bapher ki don la ki jong ki buit ban pynpaw ia ki ishu ha ka rukom kaba iahap bad ka jingangud jong u paidbah ba ki mihkhmat, bad ka VPP kala leh ia kata da kaba mih jyndat haba u Lat ula iai bteng ban kren da ka ktien Hindi watla ka VPP kala kyntu ia u ban kren da ka English.
Haba iakren bad ki nongthoh khubor, u Dr Mukul ula ban jur ia ka jinglong kongdan ban ithuh bad burom ia ka riti ka dustur ha India ba kynthup ia ka jingiapher ka ktien ka thylliej, ka dei riti bad ka niam. U ngeit ba ka long kaba kongsan ban burom ia kane ka jingiapher khnang ban lah iatreilang khambha kum ka Ri.
Haba kylli halor ka shithi jong ka TMC bad Congress bala phah sha u Lamphang ban ai ha ki ia ka jinglong Nongialam ka Liang Pyrshah, u Dr Mukul ula ong ba kane ka kam kam dei satia mano ban bat ia ka shuki hynrei ka dei ka jingailad ia ki ban pyndep iala ka kamram ha ne shabar ka Iingdorbar, kaba iaid kat kum ka rukom bad ki jingeh hapoh ka Iingdorbar.
Ula bynrap ba ka Liang Pyrshah ha Iingdorbar kam pat pynlong satia ia ka jingialang, ka ban shim ia shibun ki rai kat kum ka jingia ai jingmut lang jong baroh. Ula kren ruh halor ka jingdawa ba dang iaid mynta kaba iadei bad ka jingpynrung ia ka ktien Khasi bad Garo ha ka Riti Synshar ka Ri, haba ong ba ka jingiakhun kan dang iaid shakhat tad haduh ba kan da urlong.
