Shillong, Lber 09 : Ka Sorkar Meghalaya Democratic Alliance (MDA)-II, kala rai ban pynduh pyndam noh ia ka Ordinance jong ka Meghalaya Regulation of Gaming Act, 2021, ka ain kaba la pyrshah jur da ki kynhun bapher bapher ka Jylla.
Kane ka rai kala mih na ka jingialang ba nyngkong eh jong ka Kynhun Myntri ka Sorkar MDA-II ba long hynne ka sngi palei.
Haba iakren bad ki nongthoh khubor hadien ka jingialang, u Myntri Rangbah Conrad K Sangma ula ong ba ka Sorkar Jylla kan sa wanrah noh ha ka dur jong ka bill hapoh ka Dorbar Mang tyngka ban wan, ban pynduh pyndam noh ia ka Meghalaya Regulation of Gaming Act.
“Namar ka jingbym pat long Dorbar ban pyntreikam ia ka Act, ka Kynhun Myntri kala mynjur da ka Ordinance, kaba hap ban wanrah pat ha ka dur jong ka Bill ha Iingdorbar ban ai jingmynjur bad kane kan dei kaba jia mynta” ong u Myntri Rangbah.
“Ngi a mynjur ia ka Ordinance kham mynshuwa hynrei mynta bala wan ka Dorbar, kane ka dei ka rynsan ban mynjur ia ka jingpynduh pyndam noh ia ka Meghalaya Regulation of Gaming Act, 2021” bynrap u Conrad.
Namar ka jingpyrshah jong kiba bun ki kynhun, ka Sorkar Jylla ha ka 13 tarik Risaw, 2022, kala wanrah ia ka Ordinance ban pynduh pyndam noh ia ka Meghalaya Regulation of Gaming Act, 2021, kaba shah ban buh ia ki casino hapoh ka Jylla.
Ka Tnad Taxation kala wanrah ia ka Meghalaya Regulation of Gaming Act, 2021, ban teh kyndon ia ki kam khalai hapoh ka Jylla.
