Shillong Lber 07: U Nongialam ka UDP ba bam smai kum u Myntri ka sorkar jylla Bah Paul Lyngdoh ula niew ia ka sorkar MDA-II ba ialam da u Conrad K Sangma kum ka ‘Dream Team’ ne ka kynhun kaba la angnud ban ioh.
“Ngi don iaka kynhun kaba don ia ki briew kiba la ih bha ha ka kam bad kiba tbit ban treikam lada phai sha ka jingshemphang bad ka kyrdan pule jong kiba bun ki dkhot haka kynhun myntri” ong u Bah Paul.
U Bah Paul ula ong, ka jingbhah kam ia ki Myntri ka dei ka rai shimet ka ban shim da u Myntri Rangbah ka jylla bad u ngeit skhem ba u Myntri Rangbah yn pyndonkam iala ka jingstad ban pynthikna ba uwei pa uwei u myntri yn trei bha iaka kam kumba la bynshet ha ki.
Ka UDP ka dei ka seng kaba ar ha ka jingbun paid da ka jingdon 11 ngut ki MLA, kala ioh ia 2 ngut ki Myntri ha ka Sorkar MDA-11.
Haba kylli la ka seng kan lah ban treikam tang 2 ngut ki Myntri, u nongialam ka UDP ula ong, “Kaba kongsan ka dei ka jingtrei bha iaka kam (Quality) bad ka jingdon ia u number kam da kongsan than. Phi lah ban bat ia kino kino ki tnad treikam hynrei phim lah pat ban trei ia ka kam, katba phi don tang uwei u Myntri Sorkar uba bat 5 tylli ki tnad bad u lah ban treikam bad kane kadei tang ka jingpyniasyriem”.
Haba kylli la kan don kano kano ka jingiateh kular ha kaba iadei bad ka jingshim mar kylliang iaka shuki Myntri Sorkar, u Bah Paul ula ong, “Ngam don jingtip eiei ia kaba kum kane, to ngin ia iaid da ki sngi bad ban pyndonkam bha ia katei ka shi sngi ba ngin iatrei bha mynta bad ngin trei bha biang haka sngi ban wan. Ngin shim bad khmih shwa shi sngi shi sngi”.
Ula ong, ka jylla Meghalaya ka donkam ia ka jingbha bad yn pyrshang katba lah ban pyndonkam hok iaka sap kaba la ai kyrpang da u Blei bad u ngeit skhem ba kane kan long ruh na ka bynta baroh ki dkhot jong ka kynhun myntri.
