Shillong, Lber 07 : U National President ka National People’s Party (NPP) Conrad K Sangma, ula bam smai hynne ka sngi ba-ar kum u Myntri Rangbah ka Jylla ha ka sien kaba ar, ha ka jingiadonlang u Myntri Rangbah Duh ka Ri Narendra Modi bad u Myntri kam Pohiing ka Ri Amit Shah.
Humbled by this great honour to serve Meghalaya as its Chief Minister for the second term. Congratulations to all the Cabinet Ministers of MDA 2.0.
My Cabinet & I will serve the people & our state with renewed dedication, keeping our oath of service
Khublei, Mitela & Jai Hind! pic.twitter.com/NvhwERFtbW
— Conrad K Sangma (@SangmaConrad) March 7, 2023
Kiwei kiba la iadonlang ha kane ka jingialang bam smai bala long ha Raj Bhavan, Shillong, ki kynthup ruh ia u Myntri Rangbah ka Assam Himanta Biswa Sarma, u Myntri Rangbah ka Sikkim Prem Singh Tamang bad u Myntri Rangbah ka Jharkhand Hemant Soren.
Hapoh ka jingialam u Conrad K Sangma kum u Myntri Rangbah ka Jylla, ka Meghalaya kan don ruh ia arngut ki Symbud Myntri Rangbah (Deputy Chief Minister) ba kynthup ia u Bah Prestone Tynsong bad u ma Sniawbhalang Dhar.
U Lat ka Jylla Phagu Chauhan ula pynbam smai ia ki 12 ngut ki Myntri Sorkar. Nalor u Myntri Rangbah bad ki arngut ki Symbud Myntri Rangbah, kiwei ki kynthup ia u Marcuise N Marak, Rakkam A Sangma, Ampareen Lyngdoh, Comingone Ymbon bad A T Mondal kiba dei na ka NPP. Kiwei pat ki long u Bah Paul Lyngdoh bad ma Kyrmen Shylla na ka UDP, Bah A.L.Hek na ka BJP bad u Bah Shakliar Warjri jong ka HSPDP.
Ia ka bhah doh kyndang ha ka jingsam ia ki kam ne portfolios jong ki Myntri Sorkar, yn sa pynmih hapoh kine ki 24 kynta ban dang wan.
Haba iakren bad ki nongthoh khubor hadien ka jingbam smai, u Conrad ula ong ba kam long satia kaba bakla ban don ia arngut ki Symbud Myntri Rangbah hynrei kan pyni ia ka jingkhlain ha ka jingmihkhmat na ki thain bapher bapher jong ka Jylla.
Da ka jingthaw ia ka MDA-2, u Myntri Rangbah u ngeit skhem ban pynbteng ia ka jingtreikam khem shongthait bad ban pynleit jingmut ha ki kam kiba la pyntrei naduh ki san snem bala leit noh.
“Khnang ban nang lah pynjanai shuh shuh ia ki jingtei kiba don ha Jylla, ngin nang trei shitom ruh ha ki social sector, ban pynjanai ia ka koit ka koit bad ka pule dangle, ka social welfare bad ban pynleit jingmut bha sha ki samla khamtam haba phai sha ka iohkam iohjam bad ka kamai ka kajih” ong u Conrad haba kren halor ki kam ba ka Sorkar MDA-2 kan pynleit jingmut nangne shakhmat.
“Ngi hap ban pynjanai ia kiei kiba la leh ha ki san snem bala leit noh, ki juh ki skhim kiba ngi pyntrei ha kine ki snem bala leit noh ki dei kia biang namar ka jingbiang ka jingkhein jingdiah, ka jingpeitngor ba ngi la leh kin nang iai bteng ha kaban pynthikna ba kine ki skhim kin ai jingmyntoi pura ia ki nongshongshnong ha manla ki shnong ki thaw” ong u Myntri Rangbah.
Haba jubab ia ka jingkylli ba kumno ka Sorkar MDA-2 ba ialam da ka NPP kan leh halor ka kam tih beain ia u dewiong, u Myntri Rangbah ula ban jur ba ka Sorkar kam ju ailad satia ia ka jingtih beain bad kaa shim ruh ia ki sienjam ban pynthikna ba kum kine kijait kam kin ym jia satia. Ula pyntip ruh ba ka sienjam ban tih dewiong da ka jingstad saian ha Jylla kala nang iaid mynta.
“Ngi la trei shitom bha ha kine ki san snem bala leit noh bad haduh saw kynhun kin sa ioh noh ia ka jingbit ban tih dewiong bad ban ioh jingmynjur noh ia ki mining pan ha kine ki khyndiat bnai ban wan” ula ong.
Halor ki jingkynnoh jong ka BJP pyrshah ia ka sorkar MDA bala leit noh, u Conrad ula ong ba barabor ki jingiapher jingmut kin mih beit hynrei kaei kaba kham kongsan ka dei ka jingiatreilang bad ban wad ia ka lynti ban pynbeit ia ki jingeh.
