Guwahati, Lber 06: U Myntri Rangbah (CM) ka Assam, u Himanta Biswa Sarma uba la kylla long u nongialam ba kongsan jong ka BJP u la shim ia ka bynta kaba kongsan halor ka jingjop jong ka BJP ha ka ilekshon assembly kaba dang shu kut shen ha ki laitylli ki jylla ka thain shatei lammihngi (Northeast).
U Sarma u la lamkhmat ia ka kynhun North East Democratic Alliance (NEDA), kaba dei ka kynhun jong ka National Democratic Alliance (NDA), mynta lah palat hynriew snem kynthih.
Ka bor kaba u Sarma u don ha ki kam sain hima sima hapoh northeast lah ban sngewthuh ruh lyngba ka jingkren jong u nongialam ka BJP uba dei ruh u myntri barim ka sorkar Meghalaya u Sanbor Shullai.
Ka NPP bad ka BJP ki la iakhun hala ka jong ha kane ka ilekshon assembly, bad ka NPP ka la kylla long ka party kaba jop bun tam ki seat.Na ka liang u CM Sarma u la iai bteng ban plie ia ka lynti na ka bynta u Conrad Sangma khnang ba ka BJP kan lah ban aijingkyrshan ban wan ha ka bor lada ka NPP ka duna ha ka jingbun paid.
Na ka liang ka seng BJP kam shym la lah ban lehbha ha Meghalaya bad ha kaba khatduh ka la tang tang artylli ki seat hadien ba kala iakhun na ki 47 tylli.Hynrei, dei lyngba u Sarma kaba la plielad ia ka BJP ba kan iai bteng ban don ha ka bor ha Meghalaya ha ryngkat ka NPP.
Ki riew shemphang sain hima ki la iai pynpaw ba dei ka jabieng jong u Sarma ha lyndet ka jingbteng ban pynkylla CM hapoh Tripura, bad ba kane ka jingleh ka la sei ruh ia u soh jong ka jingjop na ka bynta ka seng BJP.
Katkum ki tyllong khubor la ong ba ka NDA kan thaw ia ka sorkar ha baroh ki laitylli ki jylla ka thain northeast.
Haduh mynta dei tang ka Mizoram ka jylla ha ka thain northeast ha kaba ka BJP kam don ha ka bor.Mynta u Himanta Biswa Sarma u la phaikhmat sa sha kane ka jylla ka ban leit sha ka ilekshon hajan kaba kut jong une u snem 2023.Na ka liang u Sarma un pyndonkam ia baroh ki buit treikam jong u ban pynwan ia ka BJP ha ka bor hapoh Mizoram.
