Shillong, Rymphang 28: Ka Meghalaya High Court kala hukum iaka sorkar jylla ban pynbeit noh iaka kynrum kynram haba iadei bad ka jingthmu pynkynriah noh iaki briew ba sah ha Them Iew Mawlong hadien ka ilekshon.
“Ka sorkar kadei ban shim khia mardor hadien ka ilekshon ban pynbeit iaki kynrum kynram namar, ka sorkar kala ithuh iaka jaka naka bynta ban pynkynriah iaki ba sah ha Them Iew Mawlong” la ong ka hukum bala pynmih da u Chief Justice Sanjib Banerjee haka 16 tarik Rymphang.
La kdew ba ia kane ka jingbishar la pynjlan biang shaka 17 tarik Lber 2023 naka bynta ban ai lad ia baroh ar kynhun ban mihkhmat haba iadei bad kane ka mukotduma.
Lah ban kdew ba ha 21 tarik u Risaw 2022, ka Meghalaya High Court kala pynmih iaka hukum bad la bthah iaka Harijan Panchayat Committee (HPC) ban jubab iaka jingtyrwa ka sorkar jylla ban ai jaka iaki ba sah ha Them Iew Mawlong lada ki shah pynkynriah bad la aipor ruh iaka HPC ban jubab hapoh saw taiew.
