Shillong, Rymphang 21 : U National Vice President ka National People’s party (NPP) bad Symbud Myntri Rangbah ka Jylla Bah Prestone Tynsong, hynne ka sngi ba-ar, ula kyntait war ia ka jingkynnoh ba don ka jyrsieh bamsap halor ka kam thied jaka ha Mawpdang, New Shillong Township da u Nongialam ka AITC Dr Mukul Sangma, kaba kot kot T. 140 klur.
U Bah Prestone ula pynphai kylla ia ka nia da kaba ong ba u Nongialam uba pynlut palat ia ka por ha ki jingkynnoh ia kiwei pat ki seng sain pyrthei ka pyni dak ia ka jingkhyllem jong u.
“Kam dei ka jyrsieh. Kumno phi lah ban ong ba dei ka jyrsieh?, Ka jyrsieh aiu ba u (Mukul) u kren?. Ngi hap iaid kat kum ka lynti treikam. Kumba nga ong, haba phi thied ia ka jaka, ia ka jaka la pynshongdor da ki District Collector, ka Revenue. Kam dei satia kaba la shu leh matlah da ma nga lane u Conrad hynrei ka don ha ka lynti ba hap iaid. Kawei ka lynti hadien kawei pat, kala wan na ka Tnad Urban bad leit sha ka Tnad revenue bad ka wan sha ka Kynhun Myntri bad ngi mynjur ia ka” ong u Bah Prestone haba iakren bad ki nongthoh khubor.
U Dr Mukul ula kam ba ka Sorkar MDA kala shah thad madan ia ki kam bamsap jong ka bad dawa ba dei ban tohkit mardor halor kane ka jingkynnoh jyrsiej thied jaka ha Mawpdang, kaba kot palat T. 140 klur.
U Bah Prestone ula buh jingkylli ia ka jingmut jong u Nongialam ka Liang Pyrshah ban pynlut palat ia ka bor ha kaban kawang ktien bad kynnoh ia ka Sorkar MDA haba ong “Nga sgeptieng ba u (Mukul) un shah rem ha ka elekshon”.
Ula ong ba u briew uba lapmiet ban kynnoh ia kiwei ki briew ne seng sian pyrthei, u dei u bym don daw satia lait noh tang ki “jingkynnoh, jingkynnoh bad jingkynnoh”.
U Symbud Myntri rangbah ula ong ba u sngew thikna ba naduh lashai ka sngi haduh ka 26 taruk Rymphang, u Nongialam ka Liang Pyrshah un sa pynmih ia ki jingkynnoh ba thymmai pyrshah iaka NPP haba bynrap “Hynrei naduh ka 27 tarik Rymphang, un sa leit ban thiah. Un nym kren shuh halor kine ki jingkynnoh namar ba ka jingthep vote kala kot ha ka por 4 baje janmiet”.
Haba pynpaw ba kum kine ki jingkynnoh khlem nongrim ki pyni ia ka jingkhyllem noh jong u Dr Mukul, u Bah Prestone ula ong “Namar kata, nga ong ha phi ba u Nongialam uba pynlut palat ia ka por ban kynnoh ia kiwei pat ki seng sain pyrthei ka dei ka dak jong ka jingkhyllem”.
