Agartala, Rymphang19: U Chief Electoral Officer (CEO) ka Tripura u Gitte Kirankumar Dinkarrao ula ong ba ki la don 21 ngut ki briew kiba la shah kem noh ha kaba iadei bad ka jingpmih ki jingklumar ha ka jingpynlong ia ka lekshon assembly ha Tripura.
Haba kren sha ki lad pathai khubor, u Dinkarrao ula ong, “Ki la don 16 tylli ki jingjia jong ka jingiakynad hadien ba la pyndep ia ka jingiathep vote na ka bynta ka ilekshon assembly kaba la long ha ka 16 tarik mynta u bnai ha ki santylli ki district ka Tripura. Haduh mynta la kem noh ia 21 ngut ki briew halor kine ki jingjia. ”
“Na ka liang ki bor pahara CAPF ki dang iai sah ha ki bynta bapher bapher jong ka Tripura, bad kon dang iai sah ha kane ka jylla haduh ban da dep niew ia ki vote ha ka 2 tarik u Lber u ban wan khnang ban khanglad na kino kino ki jingjia jong ka jingiakynad, ” Ong u CEO.
U Dinkarrao u la ong shuh shuh ba namar kine ki jingiakynad, la pynlong ia ki jingialang halor ka shongsuk shongsain la pynlong hynnin ka sngi Saitjain ha baroh ki 23 tylli ki Sub-Divisions.
Shuh shuh u la maham ba kino kino kiba shim ia ka ain ha la ki jong ki kti, ki bor ba dei khmih kin shim da ki lad jingpynshitom ba tyngeh pyrshah ia ki.
