Shillong Rymphang 17: Namar ka jingbym don ki nongialam kiba biang ha ka Congress ha jylla bad ha AICC kadei ka dawbah kaba la pynlong ia u Bah Ransom Sutnga ban ym iakhun iaka elekshon MLA na ka seng Congress hynrei ban iakhun noh naka seng NPP.
U Bah Ransom Sutnga udei u Executive Engineer (EE) barim jong ka PWD Building bad mynta yn iakhun iaka elekshon MLA naka seng NPP na North Shillong Constituency ka ban long ha ka 27 tarik mynta u bnai.
“Ha kaba nyngkong, nga la don jingthmu ban iakhun ia ka elekshon na ka seng Congress hynrei namar ka jingbym don ki nongialam ka Congress kiba biang hapoh ka jylla bad ha ka ri baroh kawei, kala pynlong ia nga ban iakhun noh ia ka elekshon na ka seng NPP” ong u Bah Ransom Sutnga habaiakren bad ki nongthoh khubor hynne ka sngi thohdieng.
Ula ong, kaei kaba la jia kadei kaba la jia na ka bynta ka jingbha bad kajingshim rai ka jongu ban iakhun naka NPP kadei ka biang tam namar lada u iakhun iaka elekshon na ka Congress ka lad ban jop kan duna bha.
“La ka long ha ka Ri India ne hapoh Meghalaya, ka seng Congress kam don ia ki nongialam” ong u Bah Ransom.
Ha kaba iadei bad ka chargesheet kaba la pynmih da ka seng Congress pyrshah iaka sorkar MDA kaba la ialam da ka NPP, ha kaba la kynnoh pyrshah ia u Bah Ransom halor ka jingkhyllem jong u Dome jong ka Assembly, na ka liang u Bah Ransom ula ong, “Ki nongialam ka Congress ki wan tang katto katne sngi ha ka jylla bad kim don eiei ban leh, hynrei kila shu ai tang ia ki jingkynthoh kaba pyni shai kdar ba kitei ki nongialam ka Congress kimpat rangbah ha ka jingmut jingpyrkhat.
“Haba ki pyrshang ban kynnoh ia nga halor katei ka jingjia kaba la jia haka 22 tarik u Jymmang mynshem snem, nga lah kyndit ba katei ka jingkynnoh kala mih na u nongialam kat u Pawan Khera. Kane kadei ka lynnong kaba lah dep ban khylliap noh na ka liang jong nga, ka IIT Guwahati kala dep ban aiti ia ka kaiphod, bun tylli ki RTI la dep ban leh da ki sengbhalang, kane ka long kaba kongsan ia ki nongialam ka Congress ba kidei ban tip” ong u EE barim ka PWD Building.
Kumban shu pynkynmaw, ka IIT Guwahati kaba la tohkit ia katei ka jingjia kala aiti ia ka kaiphod ha kaba kala kdew ba kala don ka jingbym ia treilang hapdeng ki kynhun bapher ha ka jingpyntrei ia ka kam.
Ka IIT Guwahati kala pynpaw ruh ba u Dome ula long uba kia shaba palat kaba ki païa kim lah ban kyrshan satia bad kala ai jingmut ruh iaka High Power Committee ba lada ka kwah ban iaid shakhmat ha kabn tei ia u Dome, udei ban long uba sting bad ban tap da ki tin CGI sheet.
“Ki nongialam ka Congress ha kano kano ka khyllipmat bad haba ki leit sha kino kino ki jaka kim dei ban kynthoh matïong pyrshah ia uno uno u briew” la pynkut u Bah Ransom.
