Shillong, Rymphang 16 : Ka Election Commission of India (ECI) kaba la shim ia ka lynti ba pyrkhing bha ban pynduh ia ka elekshon kaba shu pynbiej bad pynngop nongthep vote, kala pyntip ba ha kane ka kynti, ka jingioh kurup pisa, droks bad ki mar sam ei (freebee) jong ki kyrtong kala kiew haduh 20 shah ha Meghalaya kaba long ruh kumjuh ha Tripura bad Nagaland.
Ka ECI ka pyntip ba ha Meghalaya, ka jingioh kurup kat haduh ka 15 tarik Rymphang kala kot haduh T.63.98 klur. Na kane, haduh T. 7.36 klur ka dei ka pisa, T.2.31 klur ka kyiad ba 100299 liter, T. 31.21 klur u droks, T.0.91 klur ki mar ba shongdor bad ki T. 22.19 klur ki mar sam ei (freebee) jong ki kyrtong ban pynbiej ia ki nongthep vote.
Ka pyntip ba ka jingioh kurup baroh ha ka elekshon MLA-2018 ha Jylla kala kot tang T. 1.15 klur.
Ha ka jingwan iuhkjat ha baroh lai tylli ki Jylla ha u bnai Kyllalyngkot, ka Election Commission kala pynlong ia ki jingiasyllok ba sni bha halor ka jingpynkhreh ia ka elekshon bad ki bor pyniaid elekshon jong ka Jylla bad ruh ka Sorkar Pdeng.
Kat kum ka jingpyntip ka ECI, ka jingioh kurup na baroh lai tylliki Jylla kala kot haduh T. 147.84 klur hadien bala pynbna ia ka elekshon, kaba tam bun shah ia ka jingioh kurup hadien ba pyntreikam ia ka Model Code of Conduct jong ka elekshon MLA 2018, kaba long tang T. 7.24 klur.
Lah ban kdew ba ka ECI kala buh haduh 19 ngut ki Expenditur Observer ha Tripura, 21 ngut ha Meghalaya bad 24 ngut ha Nagaland bad ruh mar ar ngut ki Special Expenditure Observer.
