Agartala, Rymphang 16: Hapdeng ka jingpyrkhing ia ka jingpahara, ka jingiathep vote sha ka dorbar assembly ka Tripura kaba don 60 ngut ki dkhot kala sdang mynta ka step sngi Palei naduh ka por 7 baje mynstep ha kaba la sakhi ruh halor ka jingbym treikam jong ki katto katne ki EVM.
Napdeng ki 259 ngut ki kyrtong 28 ngut ki dei na ka All Indian Trinamool Congress, 55 na ka BJP, 13 ka Congress, 6 ka IPFT, 42 ngut na ka party Tipra Motha, 43 ka CPI (M), bad mar iwei na ka CPI, CPI (M)L, AIFB, TSP, RSP bad 7 ngut na kiwei pat ki party ki bym pat ioh jingithuh bad 58 na ki party shimet ne Independent.
Ki paidbah ki la ia mih na la ki jong ki iing ki sem ban pyndep iala ki jong ki hok thep vote bad kiba bun na ki, ki la ieng ia u lain ban pyndep ia kane ka bynta ha la ki jong ki polling station.
Baroh ki don 3,337 tylli ki polling station ha baroh kawei ka jylla.Ki don baroh 28.13 lak ki nongthep vote kaba kynthup ia 13.53 lak ki kynthei ki ban ai ia ka rai na ka bynta ka jop ka rem jong ki kyrtong.
Ha kawei pat ka bynta, hapdeng ka jingiathep vote, uwei u nongkyrshan ka CPI(M), u la ngat ha ka jingshah thombor shabar ka Kalacherra polling station hapoh 36-Shantirbaazar constituency ha South Tripura district.
Katkum ki khubor la ong ba la pynkit noh ia une u briew shapoh hospital da ki briew sorkar kiba la pynlong ruh ia ka jingtohkit.Halor kane ka jingjia la ujor da ka Suo Motu FIR hapoh Shantirbaazar Police Station ha South district.
