Agartala, Rymphang 15: U khliehduh ka party Tipra Motha u Pradyut Debbarma hynnin ka sngi ba Ar u la pynbna ba un iehnoh ia ka kam sain hima (politics) hadien kane ka ilekshon assembly ka ban long ha Tripura.
Haba kren ha ka jingialang ialap ilekshon ha Charilam constituency hapoh Tripura, u Pradyut Debbarma u la ong , “Kane ka dei ka jingkren sain hima kaba khatduh jong Nga namar Nga la shim ia ka rai ban iehnoh na ki kam sain hima sima.Phin ym iohi shuh ia u ‘Bubagra’ ha ki kam sain hima.Nga la sdang ia ka jingiaid lynti ha ki kam sain hima na Charilam abd mynta ka jingiaid lynti ha ki kam sain hima kan kut noh hapoh Charilam constituency.” Ia u Pradyut Debbarma la tip bha ruh kum u‘Bubagra’ hapdeng ki paidbah nongshong shnong.
“Ngan iehnoh ia ka kam sain hima hynrei Ngan iai sah ha ki dohnud ki jong phi.Nga la iakhun na ka bynta ki hok ki jong phi hynrei kiba bun ki nongialam kila iehnoh ia nga hadien ba kila shah kyntait ban ai tiket na ka party jong ngi.Kham hashwa, ki la kut jingmut halor kiba bun kiei kiei hakhmat jong nga, hynrei hadien ba kila duh tiket na ka party jong ngi, ki la leit ban pyniasoh noh bad ka BJP. Ki nongialam ki jong ngi bad baroh ki kwah ban long MLA bad long nongialam, hynrei ym don pat uwei ruh u ban pyrkhat ia ki paidbah ba duk ki jong ngi,” ong shuh shuh utei u hehduh ka Tipra Motha.
Nalor kata u la ong ruh; “Nga tharai Nga long marwei hynrei phi ki paidbah phi la iarap shibun na ka bynta jong nga ban iakhun na ka bynta ki trai shnong riewlum ka Tripura.Ki nongialam ki jong ngi ki la shukor ia nga bad iehnoh ia ka party jong ngi hynrei phi ki paidbah phi shaniah ha nga.Ka jingiakhun ka jong ngi ka long halor ki hok jong ki nongshong shnong kiba dei ki trai shnong bad Nga lah ban ong ha phi ba ngin ym ia pein ha kaba iadei bad ki hok jong ki trai shnong riewlum ka Tripura.”
Da kaba kynthoh pyrshah ia u Dy. CM ka Tripura u Jishnu Debbarma uba iakhun na Charilam constituency, u Pradyut u la ong ba une u nongmihkhmat um shym la lei ei ei ruh ha kine ki san snem ba la dep na ka bynta ki nongshong shnong ka Tripura.
“U Jishnu Debbarma u dei na ka longiing ka jong nga, hynrei na ka bynta jong nga ka ri bad ki briew jong ka ki long kiba kham donkam na ka longiing.Ka sorkar ar enjin ka la ialam bakla ha kane ka ilekshon kaba la dep, hynrei ha ka jingshisha kim shym la leh ei ei ruh na ka bynta ki nongshong shnong ka jylla,” ong shuh shuh utei u nongialam ka Tipra Motha.
Haba kren sha ki paidbah ka Charilam, u Pradyut u la myllung mynsiem bad jam ummat bad ai khublei ia ki paidba halor ka jingkyrshan kaba ki la ai na ka bynta jong u.
Ka Tipra Motha kan iakhun 42 na ki 60 tylli ki assembly seat ha ka jylla, bad ka jingiathep vote ha Tripura kan long ha ka 16 tarik mynta u bnai.
