Agartala, Rymphang 15 :Haduh kumba 12 ngut ki nongtrei jong ka seng BJP ki la ngat ha ka jingmynsaw hadien ka jingshah thombor ha ki briew ba la kynnoh ki dei ki dkhot nongkyrshan jong ka TIPRA Motha kaba la jia hynnin ka 14 tarik ha Lal Singh Mura kaba hap hapoh Charilam Assembly Constituency, Sepahijala District.
Ki tyllong khubor ki iathuh ba ki nongkyrshan ka TIPRA Motha ki la pynjulor ruh ia ka ophis treikam jong ka BJP bad thombor ia kiba bun ki dukan kiba don ha katei ka jaka. Nalor kata ki nongkyrshan ka TIPRA ki la pynjulor ruh wat ia ki kali, ki auto rickshaw, ki kali arshaka bad ia kiwei pat ki jingdon jingem.
Ia kitei kiba la mynsaw la ioh ban pyllait bad pynkit noh shapoh hospital.Ki bor pulit ki la wan poi shuh shuh ha katei ka jaka bad pyrkhing ia ka jingpahara.Hadien kane ka jingjia la ong ba na ka liang ki bor sorkar ki la shim ia baroh ki sienjam ban tehlakam ia ka jinglong jingman baroh.
Khyndiat por hadien jong katei ka jingjia na ka liang u kyrtong ka BJP napoh katei ka constituency uba dei ruh u Symbud Myntri Rangbah (Dy.CM) u Jishnu Dev Varma u la pynlong ka jingleit jurip sha katei ka jaka ba la jia ka jingshah thombor.
Na ka liang u Rajkumar Debnath uba dei u president jong ka BJP charilam Mandal u la kynnoh da kaba ong; “Ki la don haduh kumba 1000 ngut ki nongkyrshan ka TIPRA ki ba la leh ia ki kam thombor ha ki bynta jong ka Lal Singh Mura, Rangapania bad Sikhoria jong ka Charilam Assembly Constituency kaba la wanrah ka jingmynsaw ia kumba 15 ngut ki nongkyrshan jong ka party nalor ka jingshah thombor jong kiba bun tylli ki dukan bad ki kali.”
Ha kawei pat ka bynta, u Chairman ka TIPRA Motha uba dei ruh u khun syiem ka Tripura u Pradyot Kishore Manikya Debbarma u la ong, “Ki ar sngi ki ban wan ki dei ki sngi kiba kongsan bha na ka bynta jong ngi.Ki nongtrei ka BJP kin pyrshang ban leh ia ki kam pynbitar pyrshah ia ngi namar ki tip ba lada jia ei ei ka BJP kan ioh nong.Ka jingsuk ka dei ban synshar ha Tripura namar na ka bynta ki trai shnong bad ki jaidbynriew Bengali ki don ia ka jingthrang ban pynrem ia ka BJP.Wat ju pynpaw ia ka jingbitar pyrshah ia kino kino ki kynhun nongshong shnong namar kane ka pynioh nong ia ka BJP
