Shillong, Rymphang 14 : “Nga dei u lui lui ha baroh ki case bala register pyrshah ia nga tad haduh bala pynshisha ba nga donti..ha ka por ba nga don ha ka jingtohkit ki Pulit, kila pynkhein ia ka hok longbriew jong nga” ong u Assistant Inspector General (AIG) barim ka Tnad Pulit GK Iangrai uba la ioh jamin hynne ka sngi ba-ar.
“Ki kti jong nga ki khuid, ki kti jong nga kim shym la bit snam jong ki lui lui. Nga don ka jingngeit kaba pura ha ka Iingkashari bad ngan iai bteng ban iakhun ia ka jingbishar kaba hok, halor ka hok jong nga katba nga dang pynhiar mynsiem” ong u Bah Iangrai.
U Bah Iangrai ula shah kem ha ka 2 tarik Naiwieng, 2022 nala ka jong ka Iingsah halor ka jingkynnoh ba u pyndonkam bakla ia ka song pisa ka Sorkar bala mang ban pyntrei ia ka National Emergency Response System (NERS) Public Safety Answering Point (PSAP) ha Sadar Police Station Complex, Shillong.
U Bah Iangrai ula iai ban “Ha ka por ba nga don ha ka jingtohkit ki Pulit, kila pynkhein ia ka hok longbriew jong nga ha kaba nga la buh ia ka jingujor sha ki bor ba dei khmih ia kane ka kam”.
U Bah Iangrai ula kam ruh ba ki don shibun ki kam jyrsieh ha ka Tnad Pulit bad namar kane, ula shah pynlong kum u ‘Langknia”.
U iathuh ba ula file ia shibun ki RTI bad u dang ap ban ioh ia ka jubab, haba kam ba kine ki RTI kin sa sei madan ia kiba bun ki kam jyrsieh hapoh ka Tnad Pulit.
Haba kam ba ka don ka jingma kaba khraw ia ka jingim jong u, u Bah Iangrai ula ong ba ka jingim jong bad ki bahaiing hasem ki don hapdeng ka jingma, haba khein ruh ba ka dei ka jingpynhiar kput jong ki Heh ki Hain Sain Pyrthei.
“Kala sdang da ka jingtohkit. Ha ka por ba pynlong ia ka jingtohkit, kila pyllait tuh ia ka kaiphod da kaba kam ba ki sheptieng ioh nga pynjulor ia ki sakhi satar. Nga dei uei ban pynjulor ia kiei kiei baroh?. Ka jingsheptieng hi ka dei namar ba ioh nga tnad madan ia ki kam jong ki” ong u Bah Iangrai.
Haba kynnoh ba ka jingkem ia u ka dei shibynta na ka jingiasuhbuit bad bala pyntreikam da ki juh ki briew kiba donkti halor ka jingsiat iap ia u Nongialam barim ka HNLC Bah Cheristerfield Thangkhiew, u Bah Iangrai ula ong “Ha ka 2 tarik Naiwieng, haba nga ioh jingtip ba kin wan khynra ia ka Iing jong nga, nga la hap ban rieh namar nga sheptieng ioh ki leh kumba leh ia u Bah Cheristerfield namar ki dei ki juh ki briew kiba suhbuit ia kane ka kam.
