Shillong, Rymphang 14 : Ka Congress hynne ka sngi ba-ar, kala dawa ban weng noh mardor ia ki poster ba khlem ioh jingbit jong u Myntri Rangbah Duh ka Ri Narendra Modi, u Myntri kam Pohiing Amit Shah bad u National President ka BJP u JP Nadda na ki nongkynti ka Sorkar.
Ha ka shithi bala phah sha u District Election Officer (DEO) ka East Khasi Hills, u General Secretary ka Meghalaya Pradesh Congress Committee (MPCC) Sanjay Das ula ong ba ki poster jong u Myntri Rangbah Duh, Myntri kam Pohiing bad National Presient ka BJP kila mih ha kylleng ki nongkynti ka sorkar kum ha ki post elektrik, ki jaka pyniaid kali ki Pulit hapoh ka Nongbah Shillong ba pynijaboh ia ka Nongbah.
Ula ong ba kane ka dei ka jingpynkhein ia ka Model Code of Conduct. Kine ki lait noh ia kito kiba la ioh jingbit hynrei tang kito ki bym pat ioh jingbit.
“Ngi kyrpad ia phi ban pynbeit ha kaban leit weng noh ia kine ki poster na baroh ki nongkynti ka Sorkar kham kloi kat kaba lah” ong u Das ha ka shithi.
