Nongpoh, Rymphang 14: U Kyrtong ka BJP-Mawhati Bad Everis Myrsing, hynne ka sngi ba-ar ula pyllait paidbah ia ki mat treikam lada u shah jied ban mihkhmat kum u MLA jong ka Constituency ha ka elekshon ban long la 27 tarik Rymphang.
Ha kane ka sngi ki nongialam jong ka BJP Mawhati constituency ka la ioh ruh ban pdiang burom iaki nongkyrshan jong kiwei pat ki party kiba la iawan ban pyniasoh ialade sha ka BJP.
Ia kine ki Nongialam la pdiang burom da u National Vice President ka BJP u Dr. M Chuba Ao uba dei ruh u in-charge jong ka BJP Meghalaya, haka jingiadon ryngkat lang u kyrtong ka BJP u Dr. Evarist Myrsing, bah Shanbor Rympei President BJP Mawhati Mondal, bah Hilarious Lynshiang Secretary BJP Mawhati Mondal bad kiwei kiwei ki nongkitkam jong ka BJP.
Kitei ki kiba la wan ban pyniasoh ialade sha ka BJP ki kynthup iaki nongialam kiba la mih noh naka party HSPDP, Congress, UDP bad NPP.
U bah Everis Myrsing haba kren ha kane ka sngi u la pynpaw iaka jingkmen kaba khraw ban iohi ba ki nongialam naki kynhun saiñ pyrthei bapher bapher ba kin wan ban pyniasoh bad ka BJP. U la pynsngew ruh iaki mat treikam jong u ba u la thrang eh ban trei naka bynta ki nongshnong shnong ka Mawhati lada u poi sha ka thong.
