Tura, Rymphang 14 : U National President ka National People’s Party (NPP) bad Myntri Rangbah ka Jylla Conrad K Sangma, ula pynrem jur ia u Dr Mukul Sangma bad ong ba ka rai jong u ban iakhun lang na Tikrikilla ka dei ka jingibein ia ki paidbah ka Songsak kiba la pynjop ia u kum u MLA ha u 2018.
U Conrad ula kren ia kane na ki rynsan ialap elekshon hynne ka step sngi ba-ar ha kylleng ki Constituency kynthup ha Songsak ban pan jingkyrshan na ka bynta u kyrtong ka NPP Nihim D Shira, u Rakesh A Sangma bad u Rakkam A Sangma ha ka jingiadonlang u Nongialam ka Party Thomas A Sangma bad kiwei kiwei.
Haba pan ia ka jingkyrshan ia u Nihim D Shira u ban iakhun pyrshah ia u Dr Mukul na Songsak, u Conrad ula ong ba ki paidbah ka Songsak kila shem jingjynjar namar u MLA ula bunkam tang ha ka kam kynthih seng na ka Congress sha ka TMC bad khlem lah pynurlong ia ka jingangnud jong ki paidbah.
Ula khein ia u Dr Mukul kum u briew bym nang ban burom kylliang namar ka jingjied ba un iakhun na Tikrikilla katba u dang dei u MLA ka Songsak. “Ki paidbah ka Songsak ki dei ban kylli ia u Dr Mukul, lada u jop na baroh artylli ki constituency, kano ka constituency ba un iehkam” ong une u Khliehduh ka NPP haba ong ba ka mon u paidbah hi kam long shuh ia ka TMC bad u Dr Mukul Sangma un shah rem na baroh artylli ki constituency.
Haba pynpaw ba ki paidbah ka Songsak ki donbok palat ban don ia u Nihim kum u Nongialam jong ki u ba kloi ban trei naka bynta ki paidbah ka Songsak, u Conrad ula ong “U Dr Mukul um ju wan sha nga. Ula bunkam hala ka jong ka pyrthei. U klet iala ki jong ki briew naka constituency bad mynta ula khan hapdeng ka Songsak bad Tikrikilla da ka jingkyrmen ba un jop. Ki paidbah kim dei ban ngop da ki jingkular jong u bad ban vote ia ka party ka ban sa thaw ia ka Sorkar kaba bun paid eh”.
“Ngi sngewskhem ba ngin jop bun eh ki seat. Ha ka jingpeit jong ngi ha kane ka kynti, ka NPP kan jop na Songsak bad Tikrikilla ruh kumjuh. Ki sngi ba khatduh jong u Dr Mukul kila jan namar ki paidbah kin vote ia ka party kaba peit ban don ka jingkitkhlieh” ula pynpaw.
Ha Melim kaba hap hapoh ka Gambegre constituency bala pynieng da u Rakesh A.Sangma , u Conrad ula ther tyngeh ia u Saleng Sangma bad ka Congress namar ka jingbym lah khie khlieh shuh ha Meghalaya bad ka bym ikot bor ban jop wat tang 2 seat ha ka Jylla baroh kawei.
U Myntri Rangbah ula ban jur ba ka NPP kala trei da ka jingleh hok bad shimkhia shisha ban pynurlong ia ki jingkular bad ki jingdawa jong u paidbah. Ula pyntip ba ka Sorkar kala pynkha ia bun ki Civil Sub Division bad C&RD Block ha u snem bala lah hapoh ka Jylla kiba dei ki jingangnud jong u paidbah la slem bha bad ia kane la lah ban pynurlong tang da ka Sorkar ba ialam daka NPP.
Ha ka jingialap elekshon ha Rongara kaba hap hapoh ka Rongara-Siju Constituency bala pynieng da u Rakkam A Sangma, u Conrad ula ong ba ha kine ki san snem balah, wat hapdeng ki jingtynjuh kiba bun, ka Sorkar ba ialam daka NPP kala lah ban pyntyllun ia ki kam pynroi bapher bapheer ha Jylla.
“Ka jinglong jingman ka sain pyrthei ha u 2018 bad 2023 kala iapher bak ly bak. Ki paidbah ha Meghalaya mynta kila ai ka jingshaniah ba pura ha ka NPP, kaba la pynlong ia u Dr Mukul Sangma bad ka Kynhun ban mih noh na ka Congress bad leit iasoh sha ka TMC. Kila jop 21 seat ha u 2018 hynrei mynta ka Congress kam don shuh wat tang uwei u MLA ruh” ula bynrap.
U Conrad ula ong ba ka Congress ka don hapdeng ka kynrum kynram ha ka kam long Nongialam bad kane ka party kala nang tlot ha kylleng ki Jylla hapoh ka Ri. “Ka Congress Party kala shah kyntait ha kiba bun ki Jylla hynrei u Dr Mukul bad ka jingkhein jong u ban iasoh sha ka TMC kala bakla lut namar kane ka party kam don lawei satia hangne. Ka TMC kala kyrsum ha ki jyrsieh bapher bapher ha West Bengal bad la i kumba kane ka party kan sa khyllem ha Meghalaya. Ki MLA ka TMC Marthon Sangma bad Jimmu Sangma kila ieh ia ka TMC ban iasoh sha ka NPP namar ki sngewthuh ba kim don lawei ha ka TMC” ula ong.
