Shillong, Rymphang 14 : Ka Election Commission kala phah show cause notice ia ka Chairperson ka Meghalaya State Commission for Women (MSCW) Kong Phidalia Toi halor ka jingkynnoh ba ka pynkhein ia ka Model Code of Conduct da kaba iashimbynta haka rally elekshon jong u kyrtong ka NPP na Jowai bah Wailadmiki Shylla.
Ka Election Commission kala bthah ia ka kong Phidalia ba kan ai ia ka jubab hapoh ka arsngi.
Kane ka jingai show cause notice kala mih hadien ba ki Nongialam ka Congress ba ialam da ka Media Coordinator ka AICC Bobbeeta Sharma bad Adv Mathew Anthony lem bad ka President ka Mahila Congress Kong Joplin Scott Shylla, kila aiti ia ka jingujor hakhmat y Chief Electoral Officer (CEO) hynne ka sngi ba-ar ba dawa ban weng mardor ia ka Kong Phidalia kum ka Chairperson ka MSCW bad ban pynduh noh (disqualify) ia ka jinglong kyrtong u Bah Wailadmiki.
“Ngi la pdiang bad shimkhia ia kane ka jingujor bad nga la aiti ia ka kam sha u Addl CEP ba khmih ia ka MCMC u ban sa pan ia ka kaiphod na u Deputy Commissioner ka West Jaintia Hills District ban pynshisha ia ki mat bapher bapher bala kdew ha ka jingujor” ong u Bah FR Kharkongor, CEO ka Jylla.
“Hadien ba iohpdiang ia ka kaiphod, ki jingpynshitom kin sa bud. Lada I donkam, kan don ruh ka jingai show cause ia baroh arliang mamla khnang ba kan biang tarajur. Ngi hap ban ioh jingpynshai na baroh ki liang, na ki bor District ngin hap ban ioh ia ka kaiphod, ngi hap ioh ia ka jubab na ki briew kiba shah ujor” ula ong bad bynrap “Hadien ngin sa phah ia ka kaiphod sha ka Election Commission, ka ban sa ai hukum ia ngi kumno ban leh”.
Haba kylli, u Bah Kharkongor ula ong “Ka Chairperson jong ka Women’s Commission ha ka jingshisha ka dei Political Appointee ne ba thung da ki party ba don ha ka bor hynrei ngi hap ban peit ia ki rules bad ngi hap ban khmih ruh haduh katno kane ka jingujor ka Ieng. Ia mynta hi tad haduh ba ngan da ioh da ki jingthoh ia kiei kiei baroh, kiei kiei baroh ki dang long kloi palat ia nga ban ong eiei”.
Ka Congress ha ka ujor kala ong ba lyngba ki video bad ki dur bala sam sha ki lad pathai khubor, la iohi ba kane ka Chairperson ka MSCW kala iaid ha syndah bad u kyrtong ha ki surok ha sor Jowai. La iohi ruh ba la ieng ryngkat bad u Kyrtong shabar ka Ophis u Deputy Commissioner ha ka sngi ba u leit ban thep kyrteng.
Ka Kong Phidalia ka bat ia ka kam kum ka Nongtei Sorkar hadien ba kala shah thung kum ka Chairperson ka Commission ha u bnai Nohprah 2021.
Kat kum ka Meghalaya State Commission for Women Act, 2005, ka Chairperson, Vice Chairperson, ki Dkhot bad ki OPhisar nalor ki Nongtrei ka Commission la khein kumki Nongtrei Sorkar kat kum ka jingmut jong ka kyndon 21 jong ka Indian Penal Code bad kyndon 2 (C) jong ka Prevention of Corruption Act, 1988. Ka Kong Phidalia kala pynkhein ruh ia ka Representation of Peoples Act, 1951.
“Ka Kong Phidalia kala pynkhein ia ka Model Code of Conduct da kaba iashimbynta ha ka rally elekshon jong u kyrtong ka NPP. Namar kata, ngi kyrpad ia ka ECI ban shimkhia ia kane ka jingpynkhein bad ban weng ia ka kong Phidalia n aka kam Chairperson bad ruh ban pynduh ia ka jinglong kyrtog une u Kyrtong ka NPP” ong ka Congress ha ka jingujor.
Ha ka 13 tarik Rymphang, u Returning Officer ka Jowai Constituency ula phah ia ka show cause notice sha ka kong Phidalia ba bthah ia ka ban jubab balei Ba ym dei ban leh eiei pyrshah ia ka namar ka jingpynkhein ia ka Meghalaya Service (Conduct) Rules, 2019.
“Ia ka jubab jong phi dei ban pynpoi sha uba soi harum hapoh ka arsngi lem kumta yn sa leh eiei pyrshah ia phi” ong u RO.
