Nongstoiñ, Risaw 12: Ki rangbah nongialam jong ki shnong kiba hap hapoh ka Mawshynrut C&RD Block, ki la maham jur ban pynïap pathar ïa ki don um doh wah da kaba pyndon kam da ki dawai bih, khang jar, siat bom, pynrngad ïa ki um, shoh khariew bad kiwei kiwei.
U Bah Boylan Langrin Myntri ka Hima Nonglang Sirdarship, u la ong ba ka jingpynïap pathar ïa ki doh um doh wah, ka dei ka kam beaiñ bad ka kam kaba sniew haduh katta katta. U la ong ruh ba baroh ki riew rangbah katei ka thaiñ naduh ki sordar shnong, ki sengbhalang, ka synjuk ki nongkhwai bad ki paidbah ki don ka jingïatreilang, ban khang pyrshah ha kaban pynïap pathar ym tang ïa ki doh um, hynrei ïa ki mrad ki mreng, ki sim ki doh bad baroh ki jingthaw ba im ha um bad ha ryngkew.
Utei u rangbah u la pynpaw ia ka jingsngewkhia halor ka jingpynjulor ïa ka mariang da kaba pom pathar ïa ki khlaw ki btap, ki dieng ki siej.
Ula ong ba ki riew rangbah bad ki nongsynshar shnong jong katei ka thaiñ, ki ai ka jingkyrshan ba pura ïa ka jingpynjari jong u District Magistrate da ka kyndon 144 Crpc ha baroh kawei ka District, ha kaba ïadei bad ka jingpynïap pathar ïa ki doh um doh wah bad ïa ki mrad ki mreng.
Ula kyntu ïa ki paidbah nongshong shnong ba lada ki lap ïa kino kino kiba pynïap pathar ïa ki doh um doh wah, ki mrad ki mreng bad ki sim ki doh, ki dei ban pyntip ha ki riew rangbah, ne ki sordar shnong khnang ba kin leh ïa kaba donkam bad ba kin pynshitom ïa ki katba shong ka aiñ, da kaba ïatreilang bad ki bor pynïaid District bad ki pulit.
