Tura, Rymphang 12 : U Myntri Rangbah ka Jylla Conrad K Sangma hynne ka sngi U Blei, ula ong ba ka Sorkar MDA ba ialam da ka NPP, kala trei khlem shongthait ban pynthikna ba ka jingshongsuk kan don hapoh ka Jylla.
“Kiba bun ki lah ban pyrkhat ba ka Jylla ka dei kaba jyllei ki kam kaikhlaw bad kan iai neh kumjuh, hynrei, ngi la kut jingmut ban pynthikna ba ka jingshongsuk shongshngain kan don hapoh ka Jylla. Ki bor syntiat jong ngi kila peitngor bha ia ki kam dawa pisa bad ki kam pyntriem ia ka imlang sahlang, bad ngi la lah ban kem ia kum kine ki kam ban pynthikna ba kin ym jia shuh” ong u Conrad ha ka jingialap elekshon hynne ka sngi ha South Tura.
Haba kren halor ki kam umsnam jong ki katto katne ki kynhun Sengbhalang ha Shillong, une u Khliehduh ka NPP ula ong ba ki briew kila sheptieng ban iaid ha ki surok bad lynti syngkien hadien kine ki jingjia. “Kila bun ki khep ba pynthut ia ka shongsuk shongsain, hynrei kam mut pat ba ka Sorkar kala shongsngap jar. Ki Pulit jong ngi, kila trei khlem shongthait ban tehlakam ia kine ki jingjia bad ban wanrah pat ia ka jingshongsuk” ula ong.
Haba kren halor ka thong ka Sorkar ban pynlong ia ka Meghalaya kum kawei na ki 10 tylli ki Jylla ba hakhiehduh, ula ong “Kiba bun kila khein kamkai ia kane ka thong jong ngi. Ngi la iai shah bad ngi lah ban rah ia ka kyrteng jong ka Meghalaya ha kiba bun ki kam”.
U Conrad ula kdew ruh ba ka Meghalaya mynta kala wan hakhmat eh ha ka start-up ecosystem ha ka Ri, ka la nang kiew n aka kyrdan ba 27 sha ka kyrdan ba 2 mynta ha ka jingai injek ia ki Khunlung (Immunisation), lyngba ka skhim JJM ngi la lah ban pynpoi umbam sha ki 2.5 lak tylli ki Longiing n aka 4000 tylli ha u snem 2018.
“Ka Sorkar jong ngi kala treikam da kaba buh ia ka Mission bad ka thong ban pynthikna baka Meghalaya kan iaid ha ka lynti kaba sted bha ha ka jingpyntreikam ia ki kam pynroi” ula ong.
Haba kren halor ki kam pynroi hapoh ka South Tura Constituency ba u mihkhmat ha kine ki 5 snem, ula ong ba ki paidbah kila dawa ia ki streetlight, ki Iingshnong, ban ioh umbam umdih, ki surok sha ki kyntoit bapher bapher haba ong ba hadien bala pyndep ia kine ki kam ha kiba bun ki kyntoit, ka don ruh kawei ka shnong kaba dawa ban ioh ia ka swimming pool.
“Ka jingkhmih lynti jong ki paidbah ha Tura kala nang heh, ki paidbah ka Tura kila shah iehbein la bun snem hynrei mynta ngi la lah ban pynurlong ia ki jingangnud jong ki paidbah. Ngi la lah ban wanrah ia ki kam pynroi kiba lah ban iohi dala ki jong ki khmat ha Tura lyngba ka Smart Town Project, Town Beautification” ula ong.
U Conrad ula pyntip ba haduh 250 tylli ki surok sha ki kyntoit bapher bapher ki dang iaid mynta ha ka jingpyntrei ha Tura bad kumba 70-80 percent na ki nongshongshnong ka Tura kila ioh ia ka kor umbam umdih hala iing.
Haba ban jur ba kala don ka jingdawa thymmai ia ki kam pynroi ha Tura, une u Khliehduh ka NPP ula ong ba san snem mynta, kiba bun ki shnong ha Tura kila mad jingeh na ka jingkyrduh um hynrei ka sorkar jong u kala lah ban weng ia kane ka jingeh ha kiba bun ki shnong.
“Ka jingkular jong nga ia ki Nongshongshnong ka Tura ka long ba ngin nang iai trei shitom shuh shuh ban pynsuk ia ka jingim jong ki briew jong ngi. Ki paidbah ka Tura kila jied kila jied ym tang ia u MLA hynrei ia u Myntri Rangbah ka Jylla” ula pynbna.
Ula ong ruh ba ka NPP kan sa thaw biang ia ka Sorkar kaba tam palat ia ka jingdon ki MLA ha Jylla (absolute majority) bad ki paidbah kim dei ban iaid lait ia kane ka kabu.
