Imphal, Rymphang 11: Arngut ki nongialam ka BJP youth wing ki la ngat ha ka jingmynsaw jur hadien ka jingshah thombor ha ryngkat ka jingshah pynap suloi ha ka miet 9 tarik mynta u bnai ha ki briew ki bym lah ban ithuh.
Kine ki arngut ki briew kiba la mynsaw ki kynthup ia u nongaiktien jong ka BJP Manipur Pradesh, u Mayanglambam Sureshkumar bad u office secretary ka BJYM, u Alex Ningombam.Ia kine ki lanot la pynkit noh shapoh Raj Medicity ha Imphal na ka bynta ban aijingsumar.
Katkum ki jingtip ba la ioh lyngba ki tyllong khubor, la ong ba kane ka jingjia ka la jia katba kine ki lanot ki dang wanphai sha la iing na ki katto katne ki prokram.
Na ka liang u Myntri Rangbah (CM) ka jylla u N Biren Singh u la pynrem jur halor kane ka jingjia.Ha kajuh ka por u la ong ruh ba na ka liang ka sorkar jylla ka la sdang ban pynlong ka jingthwer ban lapdien ia kitei ki runar kiba donkti ha katei ka kam pyntriem.
Lah ban pynkynmaw ba ha ka 4 tarik mynta u bnai ka la don ka jingbthei bom hajan ka jaka ba thmu pynlong ia ka jingiakop pyni riam ha Imphal district ka Manipur.Kane ka jingbthei bom ka la wan long ruh hashwa ka jingwan jngoh jong ka Sunny Leone sha kane ka jylla ha ka 5 tarik kaba bud.
