Shillong, Rymphang 10: U President ka Hynñiewtrep National Youth Front (HNYF) bah Sadon Blah ula ong ba ka seng bad ki paidbah ka jylla kim lah ban pdiang iaka jingpyrshang ki seng saiñ pyrthei ban pynlong ishu ilekshon ia ka mat jingdawa pyntreikam Inner Line Permit (ILP).
Haba kren sha ki lad pathai khubor u bah Sadon ula ong ba baroh 60 ngut ki MLA ki la pheil ia haba iadei bad ka jingdawa pyntreikam ILP ha Meghalaya bad baroh ki seng saiñ pyrthei kiba don haka sorkar mynta bad hashuwa u snem 2018 ki la pheil ban pynurlong iaka jingdawa pyntreikam ILP hapoh ka jylla.
“Lada ka BJP kaba don MLA hangne bad synshar ha Delhi, ka NPP kaba dei ka paralok jong ka BJP, ka UDP, HSPDP, PDF bad baroh hi ki seng ki la shu lehkai ia kane ka mat jingdawa ILP bad kumjuh ruh ka long lada phai shaka Congress namar hapoh ka jingialam u Dr. Mukul Sangma kum u Myntri Rangbah ka jylla ka la kyntait ia ka ILP ha ki snem ba la dep” la kynnoh u bah Sadon.
U bah Sadon Blah ula kyntu ruh iaki paidbah ba kidei ban da pyrkhat jngai bad da pyndonkam ia ka bor pyrkhat shuwa ban Vote bad dei ban jied nongmihkhmat noh da ka jingstad ym ban shu shongshit ha ki kam tamasa jong ki kyrtong ki ban iakhun ha kane ka ilekshon ka ban long ha ka 27 tarik mynta u bnai.
Ula ong ba ka jylla watla kala kynjoh shaka 51 snem hynrei lada peit ha baroh ki liang ka jylla ka dang duna ha ki bun bynta bad haduh mynta ka jylla ka long lyngkrang lut namar ym don sorkar satia kiba don jingkit khlieh ban wanrah da ki Polisi ban myntoi u paidbah ka jylla.
“Ka jylla kala kynjoh 51 snem hynrei phin peit ha ka pule puthi ruh, ka jylla ka dang sniew dur, phin peit ia ka koit ka khiah ki jaka sumar ruh kiba i sangsot, phin peit ia ki nongrep ruh ym don Polisi ban kyntiew ia ki, phin peit wat ia kata ka Tourism kaba ka sorkar jylla ka kob hynrei kane ruh kala shu pynsah lyngkrang, haka liang ka iohkam ki samla ruh ka pynduh jingkyrmen iaki samla bad dei namar kane ka seng ka kyntu iaki paidbah ban pyrkhat bha hashuwa ban thep Vote” la ong u bah Sadon.
