Nongstoiñ, Rymphang 9: Tang artaiew duna shuwa ka elekshon, ka Bharatiya Janata Party (BJP) kala pra phom ha Nongstoin Constituency namar ka jingiapher jingmut hapdeng ki Nongialam bad ki Nongkitkam jong ka party.
Kane ka jingiapra kala mih na ka jingiapher jingmut halor ka rai jong ka party ban ai ticket ia u MLA barim Bah Diosstarness Jyndiang.
Uwei na ki Nongialam ka BJP Bah Dimandar Lyngdoh kat kum ka kyrwoh, ula pyntip ba u dei uwei na kiba iakhun ban ioh ia ka ticket jong ka BJP bad ia uba ki Nongialam ka Jylla kila kular ruh haba buh ia ka thong ba u dei ban leit thaw haduh 25 tylli ki Polling Booth Committee hapoh ka Constituency.
“Nga la dep thaw haduh 32 tylli ki Polling Booth Committee ha baroh kawei ka Constituency bad baroh kine ki Committee kila treikam pura naduh ba thaw ia ki badka Party ruh kala sdang suhthied bha” ong u Bah Dimandar.
Hynrei u ong ba dei u President ka BJP Nongstoin Bah Mathew Nongrem uba la leit khroh ia u Bah Diostarness Jyndiang ban wan rung sha ka BJP ryngkat ka jingkular ban pynioh ia ka ticket da kaba suk. U ong ba une u MLA barim ula kular ban wan rung bad ban wanrah haduh san hajar ngut ki nongkyrshan.
U Bah Dimandar ula kynnoh ba hadien ka jingwan rung u Bah Diosstarness, u Bah Mathew bad u Bah Dios kila rai ban bujli noh ia baroh ki nongkitkam jong ki 32 tylli ki Polling Booth bala thung da ma u.
“Ki Nongkitkam jong ki Committee haba ki ioh jingtip ia kane, kila rai ban mih noh na ka BJP bad ban nym ai satia ia ka jingkyrshan ia u kyrtong ha kane ka elekshon ban wan” ong u Bah Dimandar.
