Shillong Rymphang 09: U Nongialam ka Congress u Bah Vincent H Pala hynne ka nsgi ula pyntip ba ka seng Congress kam ju pynbna lypa iaka kyrteng jong u Myntri Rangbah ka jylla.
“Ha Meghalaya, ngim ju pynbna lypa iaka kyrteng jong u kyrtong uban long u Myntri Rangbah. Shisien ba ki kyrtong ka seng kila shah jied kum ki MLA, kumta kin sa shong bad shim iaka rai iano kin jied ia u Myntri Rangbah” ong u Bah Pala haba iakren bad ki nongthoh khubor.
Ula ong, ka Congress kam duna haka jingdon ki nongialam hapoh ka seng.
“Ngi don bun ngut ki briew kiba lah ban long Myntri Rangbah. Kumta ngim ju jied lypa ia u Myntri Rangbah hynrei ynda ki paidbah kila ai ka jingshaniah iaka seng kumta ia u Myntri Rangbah yn sa jied hi da ki nongthawaiñ jong ka seng” ong u Bah Pala.
Ka seng Congress kala mad iaka jingeh kaba khraw haba 17 ngut ki MLA ki jongka kila mih lut naka seng bad kila leit ban pyniasoh noh bad kiwei pat ki seng saiñ pyrthei.
U Bah Pala ula ong, kito kiba donkti ha ki kam kiba long be-aiñ kim don shuh hapoh ka seng Congress.
“Kito kiba pyrshah ia ki Rangbah Shnong, kito kiba donkti haka kam jyrsieh ha ka pule puthi bad kiwei kiwei kim don shuh hapoh ka seng. Mynta ngi lah ban ong ba ki briew kiba don ha ka Congress kim dei satia kiba donkti ha kino kino ki kam be-aiñ, kum u Dr Celestine Lyngdoh, Bah Ronnie V Lyngdoh, Bah PN Syiem. Da ka jingsngewsarong nga lah ban ong ba kito kiba donkti ha ki kam be-aiñ kim don shuh hapoh ka seng Congress” ong u Bah Pala.
Ula ong, lada ka Congress ka ioh iaka lad ban wan haka bor kan pynthikna baka jylla Meghalaya kan ioh iaka sorkar kaba lait na kino kino ki kam bamsap.
