Shillong, Rymphang 09 : U Kyrtong ka United Democratic Party (UDP) na North Shillong uba dei u Director ka Health Services (MI) barim ka Jylla Dr Aman War, hynne ka sngi palei, ula thalain tyngeh ia ka Liang Pyrshah All India Trinamool Congress (IATC) namar ka jingpynkylla ishu politics ia ka khlam Covid-19 bad pynthohbria ia ki briew (covid warriors), kiba iarap ia ki paidbah ha ka jingwan lynshop ka khlam.
Une u DHS (MI) barim ula kynthoh ia kane halor ka jingkren ba dang shen jong ka General Secretary ka TMC Women’s Wing Kong Noor Warjri.
Ka Kong Noor Warjri kala kynnoh ba une u DHS ula kam ia ka jingbym bna eiei halor ka jingpynlut ia ka song pisa ba kot T. 800 klur ha ka jingiakhun ia ka khlam Covid-19 bad pyrshang ban saitkhuid hakhmat ki nongthep vote jong ka constituency.
Haba kop ia ka kong Noor Warjri ban iatai nia halor kane ka kam, u Dr War ula ong “ Ka jingpyrthuh bud ia kaei kaba I (Noor) ioh jingtip na kiwei, kan ym iarap satia. Lada i kwah ban iatai nia halor kane ha kano kano ka por, ha kano kano ka jaka, nga long uba kloi”.
Une u Kyrtong ka UDP ula ong ba ki jingkynnoh I Kong Noor Warjri ba u leh bymm bna halor ka jingpynlut ha ka khlam Covid ka dei kaba shu lamler kumba long ki jingkular WE Card bad MYE Card ka TMC.
“Ine I Kong I ong ba nga leh bym bna halor ki bill, nga sngew ba ka dei kaba bakla. Ka dei kaba shu lamler kum ki card thok ba kila sam haduh mynta ba ong ba kin sa siew ia phi tad ynda ngi la wan ha ka bor” ula bynrap.
Haba kyntu ia ine I Nongialam ka TMC ban shim ia ka jinghikai naka “rukom rep syrti” (jhum cultivation), u Dr War ula ong “Ka rep syrti kala wanrah ia ka jingjot ba shyrkhei bad ki briew kila hap ban krih na kawei ka jaka sha kawei pat, na kawei ka party sha kawei pat, ki ieh shadien tang ia ka jingjot. Namar kata kum ia kine ki briew, haba ki pynmih ia kano kano ka jingkynnoh, ki hap ban khmih shuwa iala ka kyrpong iing bad sa kren eiei ha ka kamra shongkai”.
Ula bynrap “Ia kum kine ki jingkren, ngin sa iakhmih hadien ka 2 tarik Lber, la ngi lah ban pyniadon bynta lang ia kum kine ki briew ha ki kam synshar khadar”.
Une u DHS(MI) barim ula ban biang baka Directorate ha ka por jong u, kala pynlut tang T. 248 klur ha ka jingiakhun ia ka khlamCovid-19 kat haduh ka por b aula shongthait na ka kam Sorkar.
Haba pyntip ba ki jingpynlut kiba tam ban iakhun Covid kam shym la iaid lyngba ka DHS(MI), u Dr War ula ong “Ta ka daw nga ong ba ngam tip ba kumno ki pynlut ia kane ka pisa ba tam kaba la kot haduh T. 800 klur tam”.
Haba sot ia ka jingkren ba ka jingtip ba khyndiat eh ka dei kaba ma shibun, ula ong “Haba phi kren ia kum kine ki ishu kiba ktah bha, phi hap ban tip, phi hap ban don ia ki sakhi bad phi. Lada phim don ia ki sakhi bad ong ba kumno baroh ki bill la pyniaid lyngba ka DHS, kane kam long kumta”.
“Lada ki bill ki iaid lyngba ka DHS, ngin jin da iathuh ia phi ba katno ba ngi la pynlut bad nga la ai ia ka jingkhein kaba beit. Ki lah ban pan ia ki jingtip ha kano kano ka por namar la dep wanrah ia kane ka jingkhein hapoh ka Iingdorbar Thaw Ain la bun sien. Nga tharai ka dei ha u Nailur 2022, haba ka jingkylli kala mih biang hapoh ka Iingdorbar hynrei ngam shym la don shuh ha ka kam sorkar” ula bynrap bad ong “Namar kata, nga ieng ha ka jingkren jong nga ba ngam don jingtip ia ka jingpyntip ia palat T. 248 klur”.
U Dr Aman ula ong ba ki briew kiba la pynlut ia ka T. 803 klur kin dei kiba biang eh ban jubab ia kane ka kam bad ong “Haba nga ong ia kane, kam mut pat ba nga ong baka don kano kano ka jingleh bym hok halor kine ki jingpynlut baroh”.
U Dr Aman ula pyntip ruh ba katto katne na ka pisa la pyllait ruh sha ki MLA haba sdang jong ka khlam Covid-19 hapoh ka Jylla.
“Lehse, kane ka bynta jong ka jingpynlut kala paw ruh ha ka T. 803 klur hynrei ngam tip eiei ia kane namar kam shym la iaid lyngba jong nga. Nga tharai ki nongshongshnong ki long laitluid ban pan ia kane ka jingtip nala ki jong ki MLA ba kumno ki pynlut ia kane ka pisa bala pyllait da ka Sorkar khatam halor ka khlam Covid-19. Kiwei ki jingpynlut, lada ki don, la ka dei na kano kano ka Agency kum ka NHM, kiwei ki Directorate, kim shym la iaid lyngba jong nga kum u DHS(MI) ha katei ka por” ula ong.
Haba thalain tyngeh ia ka TMC halor ka jingpynshang ban pynlong ishu ia ka jingiakhun ia ka khlam Covid, u Dr War ula ong “Kila (TMC) pyrshah ban pynlong ishu ia kane ka kam, kila pyrshang ban pynthohbria ia nga kum u Director bad kila pyrshang ban pynthohbria ia kiwei ki Nongialam kiba iakhun ia ka elekshon kum u Bah Micheal Kharsyntiew, uba dei uwei na ki katto katne ngut kiba la wan ban tyrwa ia ka jingiarap sha ka DHS ha kato ka por haba ka Jylla baroh kawei kala kulmar thlim. U dei uwei na ki katto katne ngut uba la mih shakhmat namar ula ioh ia ka jingiarap na shabar ka Jylla, u kwah ban iasam lem bad ngi la kyrpad ia u ban iaid lyngba ka Ophis u DC bad kane ka dei kaba ula leh”.
Ula ong ba ka jingiaroh ka dei ia kaban ai sha kiwei kiwei ki briew kiba la noh synniang da ki jingbam jingdih ia ki briew kiba donkam ha ka jaka ban pynrem ia ki bad shu peit siar na ki khalaki haba kine ki kam ki dang iaid.
U Dr Aman ula buh jingkylli ia ki Nongialam ka TMC ia kaei kaba kila leh haba ki briew kila mad jingeh na ka jingwan lynshop ka khlam Covid-19 bad ong “Kila shongkhop ha Iing katba kiwei ki dang trei ia ki kam kum ki civod warriors, ngi la mih ban iarap ia ki briew bad kum kine ki briew ngam pat ju iohsngew ha ka por ba lynshop ka khlam ba kin mih bad iarap ia ki paidbah.
“Lehse kila shu peitsiar na ki khalaki bad shu peit kai ia ki kali ba bun jait kiba wan ban sam jingbam, ki kali lehse ML01, ML02, ML04 bad ML03 ne kano kano hynrei kine ki dei ki briew kiba mih ban iarap bad phi pat phi kwah pynthohbria ia ki. Phi pyrshang ban pynhap ia ki shapoh namar ba ki iarap ia ki briew” ula ong.
Halor ka lawei jong ka TMC ha kane ka elekshon, une u Kyrtong ka UDP ula ong “Kaei kaba ki kwah kan dei kaba kin ioh”.
