Tinsukia, Rymphang 09: Ka jingiather kuli hapdeng ki pulit ka Assam bad ki dkhot jong ka kynhun seng lehnoh United Liberation Front of Asom – Independent (ULFA-I) ka la khie kynsan ha ki bynta jong ka Margherita, Assam mynta ka step 9 tarik kaba la wanrah ka jingiap jong uwei u lehnoh ka seng, ong ka tyllong khubor.
Katkum ki khubor la iathuh ba kane ka jingjia ka la jia hapoh Tikak Mulung Parbathajan kaba don ha ka sor rit Margherita hapoh Tinsukia district ka Assam
Ia kane ka jingleit khynra la pynlong hapoh ka jingialam da ki heh pulit da ka jingthmu ban ioh kem ia ki dkhot ka ULFA-I kiba shong riehtngen ha katei ka jaka, kata hadien ba la ioh ia ka jingtip kaba bniah.
Hynrei, hadien ba ki bor pulit ki la wan poi ha katei ka jaka, baroh arliang ki la sdang ban iather kuli, ha kaba uwei na ki dkhot jong ka ULFA-I ia uba la tip kyrteng kum u Udai Axom la ong ba ula kyllon iap ha ka jingialeh.
U nongialam jong katei ka seng kieng atiar uba ha ka kyrdan Sergeant Major u Udai Axom la ong ba u la shongrieh ha ryngkat ki katto katne ki dkhot jong ka seng ha Margherita, ong ka khubor.
Ha kaba iadei bad kane ka jingjia na ka liang ki bor pulit kim pat shym la ai satia ia kano kano ka jingtip kaba kham bniah.
Lah ban kdew bad ki bor pahara bad ki riewkieng atiar ki bym lah ban ithuh ki la poi sha ka jingiather kuli ha une u bnai Naiwieng 2022 ha ki bynta jong ka Pengeri hapoh Tinsukia district ka Assam.
Kum ka jingpynphai kylliang kaba mardor hadien ka jingshah ther kuli, la khang khyrdep noh shipor ia ka lynti surok Digboi-Pengeri na ka bynta ka jingshngain.
